Biełarus zdymaje videa, jak kradzie adzieńnie i padroblivaje dakumienty ŭ Polščy. A jak zapachła smažanym, to kaža: usio dziela łajkaŭ
31-hadovy hamielčuk Kirył Siemianiaka paśpieŭ u junactvie adsiadzieć za narkotyki. Ciapier jon žyvie ŭ Polščy i nazyvaje siabie «hałoŭnym hanhstaram Varšavy». Chłopiec biazbojazna prapanoŭvaje ŭ sacsietkach svaje pasłuhi pa padrobcy pravoŭ kiroŭcy i lubych inšych dakumientaŭ. «Naša Niva» taksama znajšła jašče adzin jaho akaŭnt, u jakim jon publikuje videa z pracesam kradziažu adzieńnia z brendavych kram. «Heta ŭsio šou dla łajkaŭ», — klaniecca Siemianiaka.
Raźbiracca ŭ realnaści hetaha «šou» budzie polskaja palicyja: «Biełpoł», jaki pieršym źviarnuŭ uvahu na chłopca, nakiravaŭ zapyt u miascovyja orhany.
«600-800 dalaraŭ za płastyk, adzin u adzin jak aryhinał»
Biełarusy ŭ Polščy mohuć pamianiać svajo paśviedčańnie kiroŭcy na polskaje — biez aŭtaškoły i ekzamienaŭ. Siemianiaka prapanoŭvaŭ padpisčykam machlarskuju schiemu. Jon drukuje falšyvaje biełaruskaje paśviedčańnie, paśla čaho atrymalnik idzie mianiać jaho na polskaje — čystaje, ź jakim možna budzie biez ryzyki katacca pa ŭsim śviecie.
«Ja rablu vielmi jakasny płastyk, adzin u adzin jak aryhinał — ch*j adroźniš. Košt pytańnia: kali ŭ vas jość mižnarodnaja achova — 600 dalaraŭ, kali niama, my vam robim dadatkova daviedku z ambasady z paćvierdžańniem lehalnaści pravoŭ [kiroŭcy] za 800 dalaraŭ», — rekłamavaŭ Siemianiaka ŭ tyktoku, jaki ciapier, pa jaho słovach, «zabłočany chiejtarami». Tamu ŭsich zacikaŭlenych pasłuhami jaho firmy jon zaprašaje da siabie naŭprost u telehram.
Siemianiaka śćviardžaŭ, što moža zrabić falšyvyja dakumienty nie tolki dla pierasoŭvańnia na mašynie, ale i zabiaśpiečyć pašpartami «luboj krainy».
Na svajo imia 19 lipienia 2024 hoda Siemianiaka zarehistravaŭ u Polščy firmu SYBRO_LG, hałoŭnym kirunkam dziejnaści jakoj źjaŭlajecca aptovy handal. Taksama ŭ kirunkach pracy paznačanyja «fatahrafija, pierakłady, ofisnaja dziejnaść i padtrymka biznesu».
Handlem Siemianiaka taksama zajmajecca — praŭda, miarkujučy pa jaho tyktoku, złačynnym. 1 maja 2025 hoda jon zavioŭ sabie novy akaŭnt, dzie vychvalajecca tym, jak zdymaje z adzieńnia ŭ kramach antykradziežnyja birki pry dapamozie mahnita. Skradzienyja rečy, pa jaho ž słovach, jon paśla pierapradaje praz tyktok i ŭ telehram-kanale, śpiecyjalna stvoranym pad prodažy-kuplu. Miarkujučy pa pierapiskach, častka tavaru adpraŭlałasia ŭ Biełaruś.
«U nas užo banda z vaśmi čałaviek, pracujem pa Polščy, Hiermanii, Aŭstryi. Chto biez dośviedu — navučym, dałučajciesia. Ja ruchajusia ŭ hetym šmat hod i sutyknuŭsia z tym, što tavar, jaki apracoŭvajecca (kradziecca. — NN) — jaho ciažej pradać za narmalnyja babki, čym adpracavać», — dzielicca kryminalnymi natatkami mužčyna.
Aściarožna! Videa ŭtrymlivaje niecenzurnuju łajanku:
th - @Jimivinitik
U kamientarach jamu raz-poraz pišuć: «My dumali, ciabie ŭžo prykryli», «Kali ciabie ŭžo zatrymajuć?» Na što Siemianiaka supakojvaje padpisčykaŭ: «Nie, nie prykryli. Musary hetyja, pi****sy, ch*j voźmuć, asabliva polskija, usio na łajcie — uzrovień jakaści dakumientaŭ raście, na hety momant my možam navat rasijskija zrabić — usio ŭ bazie budzie, z paśviedčańniem ab naradžeńni — usio, jak treba. Kaniečnie, košt budzie nie tysiača-dźvie tysiačy jeŭra, ale heta dla płaciežazdolnych».
Usich, chto baicca pasprabavać kraści rečy i takim čynam zarablać, Siemianiaka padbadziorvaje: «Moža, i prymuć (zatrymajuć. — NN) — nie biez hetaha, ale adpuściać». I rekamienduje pry hetym razvaročvacca ŭ vialikich krainach: «U maleńkich sałodka, bazaru nul. Ale ŭ Aŭstryi kienta rubanuli z polskaj mižnarodnaj achovaj i adrazu departavali prosta da Bresta — zavieźli za ruki-nohi. Tamu a****na ruchacca — Ispanija, Francyja, Hiermanija, taja ž Polšča — u vialikich krainach jany nie mohuć kantralavać usio».
U tym samym telehram-kanale, jaki biełarus pijaryć praz svoj tyktok, jon apublikavaŭ niekalki videa z pošukam zacikaŭlenych dla pracy jašče ŭ adnoj śfiery — apošniaje źjaviłasia 26 červienia.
«Jość surjozny varušniak za surjoznyja babki — prosta treba mazhi. 10 tysiač jeŭra na miesiac, plus-minus. Patrebny chimik i varščyk, budziem varyć. Chto razumieje, pra što havorka, pišycie — nakopicie babła i zvalicie ŭ Ispaniju», — pijaryć vakansiju Siemianiaka, imavierna majučy na ŭvazie śpiecyjalista dla padpolnaj vytvorčaści narkotykaŭ.
Kirył Siemianiaka: «Heta ŭsio šou!»
Siemianiaka naradziŭsia ŭ 1993 hodzie, pastupiŭ u homielski Biełaruski dziaržaŭny ŭniviersitet transparta (BiełDUT), ale na druhim kursie papaŭsia milicyi na prodažy marychuany. Zhodna ź jaho kryminalnaj spravaj, detalami jakoj z nami padzialilisia ŭ «Biełpole», student sarvaŭ u pryharadzie Homiela «niavyznačanuju kolkaść kanoplaŭ», jakija paśla vysušyŭ i zdrabniŭ. Na vychadzie atrymałasia bolš za 200 hramaŭ — marychuanu chłopiec paliŭ sam, častku pradaŭ inšym ludziam. Za heta atrymaŭ 8 hadoŭ źniavoleńnia.
«Naša Niva» dazvaniłasia da Kiryła, kab spytać, ci nie baicca jon nastupstvaŭ, tak adkryta raskazvajučy pra parušeńni zakona ŭ siecivie.
«Heta ŭsio fejk, niesapraŭdnyja videa! Heta šou! My hulajem u kryminał, nibyta my hanhstary, — adkazaŭ jon. — Ludzi hladziać takoje, im padabajecca. Ja kali siadzieŭ u miescach nie hetak addalenych, zrazumieŭ psichałohiju ludziej: im padabajucca «Bryhada», «Słova pacana»… Voś my i hrajem šou «mamčynych bandziukoŭ».
Na zaŭvahu, što heta nie vyhladaje jak šou, u tym liku dla polskaj palicyi, kali jana ŭsio ž zacikavicca takim kantentam, Siemianiaka pryvioŭ svoj arhumient:
«Dla pačatku im treba ruskuju movu vyvučyć. Kali jany i natknucca na maje roliki, to prahartajuć. I ja žyvu ŭ svabodnaj krainie — tut ja choć na aŭto mahu s*ać».
Pry hetym Siemianiaka zapeŭnivaje, što ŭ jaho ŭsio lehalna:
«Mašyny vozim z Hiermanii (u dziejnaści firmy mužčyny paznačana: aptovy handal biez aŭtatranspartnych srodkaŭ. — NN). Kamu treba, dapamahajem rabić dazvoł na žycharstva ci pravy kiroŭcy tyja ž. Mianiajem biełaruskija na polskija. Navat kali ŭ Biełarusi ŭ vas nie było pravoŭ, možam novyja zrabić, ale ŭsio lehalna — prosta praca, kamunikacyja ź ludźmi».
«Biełpoł» prainfarmavaŭ polskich siłavikoŭ pra imavierna niezakonnuju dziejnaść Siemianiaki.
Ciapier čytajuć
Na mitynhu ŭ Vilni zatrymali pravakatara. A Cichanoŭski zajaviŭ pra namier dabivacca sustrečy ź Zialenskim19
Kamientary