Biełarus, jaki viarnuŭsia z pracoŭnaha rabstva ŭ Maskvie, pamior
Niadaŭna ŭ tyktoku raźlaciełasia historyja 69-hadovaha biełarusa Alaksandra Katlarova, jaki byŭ u Rasii ŭ rabstvie ŭ «pracoŭnym domie». Jaho sustreli ŭ Maskvie vałanciory i nabyli kvitok da rodnaha Homiela. Ale paśla mužčyna źnik.
Jak paviedamlaje pošukava-vyratavalny atrad «Puls», 4 červienia Alaksandr užo byŭ u Homieli, a paśla źnik. Cieła znajšła homielskaja milicyja. Što zdaryłasia, nie paviedamlajecca.
Niekalki tydniaŭ tamu vałancior rasijskaha dabračynnaha fondu «Mamy śvietu» (hety fond isnuje z 2016 hoda, pieršapačatkova dapamahaŭ biazdomnym, ale paśla pačatku vajny dapamahaje i rasijskim sałdatam) raskazaŭ u tyktoku pra biazdomnaha hamielčuka Alaksandra Katlarova, jaki źviarnuŭsia pa dapamohu.
69-hadovy Alaksandr raskazaŭ, što pryjechaŭ u Rasiju pracavać, ale trapiŭ u rabstva. Jon kazaŭ pra «pracoŭny dom».
«Pracoŭnymi damami» ŭ Rasii pravaabaroncy nazyvajuć nielehalnyja ŭstanovy ci damy, u jakich ludziej utrymlivajuć i prymušajuć pracavać biaspłatna ci za ježu, pad pahrozaj hvałtu, izalacyi i daŭhoŭ.
Ludziej tudy zavablivajuć frazami: «dapamožam z pracaj», «prytulim», «damo dach i ježu». U ich zabirajuć dakumienty, telefony, abmiažoŭvajuć svabodu. Prymušajuć pracavać na budoŭli, u sielskaj haspadarcy, źbirać mietałałom, žabravać, prybirać i rabić šmat čaho inšaha.
Alaksandru płacili ŭsiaho pa 50 rasijskich rubloŭ za dzień pracy (heta mienš za dva biełaruskija rubli). Jamu pašancavała — bo na rukach zastaŭsia chacia b pašpart.
Mužčyna śćviardžaŭ, što ŭ Homieli ŭ jaho jość svajaki. U vyniku rasijskija vałanciory nabyli Alaksandru novaje adzieńnie i ježu ŭ darohu, pasadzili na ciahnik u Biełaruś.
Ciapier čytajuć
«Vielmi dobra razumieju biełaruskuju movu. Navat nie dumaŭ». Źjaviłasia VIDEA razmovy biełaruskich palitviaźniaŭ ź Zialenskim18
Kamientary