Siensacyjnaje adkryćcio: zvyčajny sirop ad kašlu abaraniaje ad demiencyi
Navukoŭcy z Kanady zrabili siensacyjnaje adkryćcio: ambraksoł, jaki šyroka vykarystoŭvajecca ŭ Jeŭropie dla palahčeńnia dychańnia, zdolny zapavolić raźvićcio demiencyi pry chvarobie Parkinsana.
Jak paviedamlaje New Atlas, navukoŭcy z daśledčaha instytuta Łoŭsana pry klinicy Śviatoha Jazepa ŭ kanadskim Łondanie na praciahu 12 miesiacaŭ pravodzili kliničnaje daśledavańnie, jakoje achapiła 55 pacyjentaŭ z demiencyjaj, źviazanaj z chvarobaj Parkinsana. Častka ŭdzielnikaŭ atrymlivała ambraksoł, druhaja — płaceba. Miedyki sačyli za źmienami ŭ pamiaci, psichičnym stanie i ŭzroŭni markiera GFAP — białku, jaki śviedčyć pra paškodžańni mozhu.
Vyniki akazalisia šmatabiacalnymi: uzrovień GFAP zastavaŭsia stabilnym u hrupie, jakaja atrymlivała ambraksoł, a ŭ hrupie z płaceba jon pavialičyŭsia. Akramia taho, u tych, chto prymaŭ ambraksoł, nie nazirałasia paharšeńnia psichičnaha stanu, u adroźnieńnie ad kantrolnaj hrupy. Asoby z vysokaj hienietyčnaj ryzykaj (mutacyi ŭ hienie GBA1) navat prademanstravali palapšeńnie kahnityŭnych funkcyj.
Čamu heta važna
Parkinsaničnaja demencyja (PDD), padobna da inšych formaŭ demiencyi, prajaŭlajecca strataj pamiaci, halucynacyjami, dezaryjentacyjaj i pierapadami nastroju. Pavodle miedycynskich danych, prykładna pałova ŭsich pacyjentaŭ z chvarobaj Parkinsana sutykajecca z demiencyjaj na praciahu dziesiaci hadoŭ paśla pačatku chvaroby.
Sučasnyja mietady lačeńnia pieravažna palahčajuć simptomy, ale nie ŭpłyvajuć na samu chvarobu. Ambraksoł ža moža stać pieršym niedarahim i biaśpiečnym preparatam, zdolnym tarmazić raźvićcio patałohii, a nie tolki maskavać jaje nastupstvy.
Asnoŭny miechanizm dziejańnia preparatu źviazany z pavyšeńniem uzroŭniu fiermientu hlukacerebrazidazy (GCase), jaki sintezujecca hienam GBA1. Pry chvarobie Parkinsana ŭzrovień hetaha fiermientu zvyčajna źnižany, što viadzie da nazapašvańnia adkidaŭ u kletkach mozhu i ich paškodžańnia. Ambraksoł pavyšaje jaho kolkaść i dapamahaje źmiakčyć hetyja nastupstvy, abaraniajučy niejrony.
U Jeŭropie ambraksoł šyroka vykarystoŭvajecca jak biezrecepturny srodak pry kašlu i branchicie. Adnak u Kanadzie, ZŠA i Aŭstralii jon pakul dazvoleny dla ŭžyvańnia čałaviekam tolki ŭ miežach navukovych daśledavańniaŭ abo ŭ jakaści vieterynarnaha preparata dla lačeńnia chvorych koniej i sabak.
Tym nie mienš, cikavaść da hetaha preparata raście. U Aŭstralii pravodziacca daśledavańni jaho dziejańnia pry bakavym amijatrafičnym sklerozie, a vučonyja Kanady ŭ inšym daśledavańni vyvučajuć uździejańnie hetaha preparata na pacyjentaŭ, što pakutujuć na redkaje hienietyčnaje zachvorvańnie, viadomaje jak chvaroba Haše, źviazanaje z deficytam fiermienta GCase.
«Heta daśledavańnie žyćciova važnaje, tamu što demiencyja pry chvarobie Parkinsana mocna ŭpłyvaje na pacyjentaŭ i ich siemji», — cytuje vydańnie kiraŭnika daśledavańnia doktara Stefana Pastarnaka.
Artykuł z vynikami daśledavańnia apublikavany ŭ aŭtarytetnym miedycynskim časopisie JAMA Neurology. Dalejšyja daśledavańni pavinny paćvierdzić efiektyŭnaść i raspracavać schiemy biaśpiečnaha prymianieńnia ambraksoła jak niejrapratektara.
Kamientary