Paśla doŭhaha pierapynku 64‑hadovy amierykanski aktor Džym Kiery źjaviŭsia na cyrymonii ŭručeńnia premii «Siezar» u Paryžy. Uvahu da siabie jon pryciahnuŭ nie tolki pramovaj na francuzskaj movie, ale i prykmietna źmienienaj źniešnaściu. Častka hledačoŭ u sacyjalnych sietkach navat zasumniavałasia, što pierad imi sapraŭdy Kiery.
Džym Kiery — adzin z samych jarkich kamiedyjnych aktoraŭ svajho pakaleńnia. Suśvietnuju słavu jamu prynieśli roli ŭ takich stužkach, jak «Maska», «Ejs Vientura», «Brus Usiemahutny», «Šou Trumana», «Viečnaje źziańnie čystaha rozumu». Ekspresiŭnaja mimika i ŭnikalnaja płastyka zrabili jaho kultavaj fihuraj kiniematohrafa 1990‑ch i 2000‑ch hadoŭ.
U 2022 hodzie Kiery ahałomšyŭ fanataŭ zajavaj, što faktyčna sychodzić z prafiesii. Jon adznačaŭ, što «vielmi surjozna» razhladaje mahčymaść vychadu na piensiju, bo prahnie spakojnaha žyćcia, zajmajecca žyvapisam i duchoŭnymi praktykami. «Mnie chapaje. Ja zrabiŭ dastatkova. Mianie samoha — dastatkova», — zajaŭlaŭ tady aktor. Jon paabiacaŭ viarnucca tolki ŭ tym vypadku, kali «anioły pryniasuć scenaryj, napisany załatymi čarniłam».
Niahledziačy na hetyja słovy, niadaŭna Džym Kiery ŭvasobiŭ vobraz doktara Rabatnika ŭ filmie «Vožyk Sonik 3». Aktor iranična pryznaŭsia, što «znoŭ u spravie», bo napraŭdu jamu spatrebilisia hrošy.
Pakolki zorka redka źjaŭlajecca na publicy, jaho vychad na scenu 51‑j cyrymonii premii «Siezar» u Paryžy staŭ sapraŭdnaj siensacyjaj. Kiery atrymaŭ hanarovuju ŭznaharodu za ŭkład u suśvietny kiniematohraf — César d'honneur. Dziela hetaj padziei aktor niekalki miesiacaŭ rychtavaŭ pramovu pa-francuzsku, staranna adpracoŭvajučy vymaŭleńnie. Sa sceny jon zhadaŭ pra svaje francuzskija karani i kranalna ŭšanavaŭ pamiać baćki, jakoha nazvaŭ samym śmiešnym čałaviekam u svaim žyćci.
The entire room on their feet for the Honorary César legend—pure magic moment! ✨ #César2026 #JimCarrey
pic.twitter.com/ySWxsOycqI
Adnak u sacyjalnych sietkach najbolš abmiarkoŭvali nie źmiest pramovy, a źniešnaść aktora. Na čyrvonaj darožcy Kiery źjaviŭsia z bolš doŭhimi i ciomnymi vałasami, čym zvyčajna, što ŭžo samo pa sabie źmianiła jaho zvykły vobraz. Ale hałoŭnuju ŭvahu karystalniki źviarnuli na tvar — vočy i formu paviek.
Častka hledačoŭ paličyła, što aktor vyhladaje niepaznavalna. U internecie pačalisia paraŭnańni z fota minułych hadoŭ, a razam ź imi źjavilisia i zdahadki pra mahčymyja kaśmietyčnyja ŭmiašańni.
Vydańnie PrimeTimer apublikavała kamientar płastyčnaha chirurha ź Bievierli-Chiłz Milisient Rovieła, jakaja vykazała mierkavańnie, što Kiery moh zrabić apieracyju karekcyi vierchnich paviek. Hučali i inšyja viersii: ad botaksu i fileraŭ da nastupstvaŭ niaŭdałaj płastyki.
Who is this? Because it is definitely not Jim Carey. The eyes aren't even the same color. They don't even care anymore. Thats how you know it's a wrap. pic.twitter.com/ThgHMNC5nF
Asablivuju ŭvahu pryciahnuli vočy aktora. Niekatoryja karystalniki śćviardžali, što na zdymkach z Paryža jany vyhladajuć śvietłymi ci navat zialonymi, choć va ŭsim śviecie viadoma, što ŭ Kiery karyja vočy. Fanaty pačali spračacca, ci vykarystoŭvaŭ jon kantaktnyja linzy, abo heta prosta efiekt ad jarkaha aśviatleńnia safitaŭ. Inšyja ž zaklikali da zdarovaha sensu, tłumačačy źmieny ŭzrostam, rakursam zdymki i hrymam.
Dyskusiju padsiłkavała jašče adna detal. Kiery — viadomy laŭšun, adnak na videa z Paryža vidać, jak jon stavić aŭtohrafy pravaj rukoj. Heta stała hałoŭnym arhumientam dla prychilnikaŭ kanśpirałahičnych teoryj.
Dadatkovuju chvalu čutak spravakavaŭ dreh-artyst Aleksis Stoŭn. Na svajoj staroncy ŭ instahramie jon apublikavaŭ post z podpisam «Alexis Stone as Jim Carrey in Paris», pakazaŭšy praces stvareńnia maski i paryka, identyčnych vobrazu aktora na cyrymonii. Častka karystalnikaŭ uspryniała heta jak dokaz padmieny. Niekatoryja pajšli jašče dalej, zajaŭlajučy, što «sapraŭdny Kiery pamior», a jaho miesca zaniaŭ dvajnik.
Arhanizatary «Siezara» kateharyčna źniapraŭdzili hetyja čutki. Jany padkreślili, što vizit aktora płanavaŭsia zahadzia, a ŭ Paryž jon prybyŭ u supravadžeńni svaich blizkich ludziej: partniorki, dački, unuka i siabroŭ.
Tak ci inakš, navat paśla zajaŭ pra kaniec karjery Džym Kiery zastajecca fihuraj, zdolnaj vyklikać burnuju reakcyju hramadstva. Jak pakazaŭ viečar u Paryžy, akcioru dastatkova ŭsiaho adnaho vychadu na scenu, kab uvieś internet znoŭ pačaŭ havaryć tolki pra jaho.
Ciapier čytajuć
Aryštavany sienatar Karpicki, hałoŭny doktar Bresckaj abłasnoj balnicy4
Kamientary