Barbi z cukrovym dyjabietam. Kampanija Mattel prezientavała novuju lalku
Kampanija Mattel pradstaviła pieršuju lalku Barbi z dyjabietam 1 typu. U kampanii zajavili, što imknucca raźvivać u dziaciej pačućci empatyi i inkluziŭnaści, a taksama spadziajucca, što navinka dapamoža dzieciam z dyjabietam adčuvać siabie bolš upeŭniena, paviedamlaje Bi-bi-si.
Novaja lalka stvorana ŭ supracoŭnictvie ź mižnarodnaj niekamiercyjnaj arhanizacyjaj Breakthrough T1D, jakaja zajmajecca padtrymkaj ludziej z dyjabietam 1 typu.
«Źjaŭleńnie Barbi z dyjabietam 1 typu — heta važny krok u našym imknieńni da inkluziŭnaści i reprezientacyi», — zajaviła starejšaja vice-prezidentka i hłabalnaja kiraŭnica brenda Barbie Krysta Bierhier.
«Barbi dapamahaje farmavać rańniaje ŭsprymańnie śvietu ŭ dziaciej. Pakazvajučy takija stanu, jak dyjabiet 1 typu, my dazvalajem bolšaj kolkaści dziaciej paznavać siabie ŭ historyjach i lalkach, jakich jany lubiać», — dadała jana.
Dyjabiet 1 typu — heta aŭtaimunnaje zachvorvańnie, pry jakim arhanizm źniščaje kletki padstraŭnikavaj załozy, što vypracoŭvajuć insulin. Jaho časta dyjahnastujuć u dziacinstvie, i pacyjentam nieabchodna štodzionna kantralavać uzrovień cukru ŭ kryvi i ŭvodzić insulin.
Novaja Barbi nosić CGM — maleńkuju pryładu na ruce, jakaja bieśpierapynna vymiaraje ŭzrovień cukru ŭ kryvi. Jana zamacavana na plačy z dapamohaj ružovaha miedycynskaha płastyra ŭ formie sercajka, a na telefonie lalki — prykładańnie, jakoje kantraluje ŭzrovień cukru na praciahu dnia.
Taksama ŭ lalki jość insulinavaja pompa — nievialikaja pryłada, jakaja aŭtamatyčna ŭvodzić u arhanizm nieabchodnuju kolkaść insulinu. Jana prymacavana da talii lalki.
Adzieńnie novaj Barbi — siniaja kofta i spadnica ŭ harošak — natchnionaje mižnarodnaj simvolikaj, źviazanaj z aśviadomlenaściu pra dyjabiet.
Razam z novaj madellu kampanija taksama pradstaviła lalku Liły Mos — dački brytanskaj supiermadeli Kiejt Mos, jakoj dyjahnastavali dyjabiet u 12 hadoŭ.
U lalki Liły Mos tyja ž aksesuary CGM dla bieśpierapynnaha manitorynhu ŭzroŭniu hlukozy.
Liła Mos zajaviła, što jana ščaślivaja, što technałohii, jakimi karystajecca jana i inšyja maładyja ludzi z dyjabietam kožny dzień, ciapier jość i ŭ Barbi.
«Ja liču, što vielmi važna pryniać hetyja technałohii, bo ź imi žyć z dyjabietam stanovicca značna praściej i zručniej. Dumaju, vielmi važna nie chavać hetyja pryłady, a naadvarot — hanarycca imi», — zajaviła 22-hadovaja madel.
U apošnija hady Mattel imkniecca raznastaić svaju liniejku lalek, u pryvatnaści lalku Barbi, jakaja dziesiacihodździami była pradstaŭlena ŭ vyhladzie strojnaj błandzinki na abcasach.
U 2016 hodzie kampanija ŭpieršyniu pradstaviła Barbi «pyšnych formaŭ», a taksama «minijaciurnuju» i «vysokuju» lalek. U 2019 hodzie źjaviłasia liniejka hienderna-niejtralnych lalek i lalek Barbi ź invalidnaściu.
Taksama Mattel vypuściła lalek ź inšymi asablivaściami — naprykład, lalku z parušeńniami zroku i lalku ź sindromam Daŭna.
Ciapier čytajuć
Cichanoŭski raskazaŭ, što treba było rabić u žniŭni 2020-ha5
Kamientary