«Nie źviazana z vajskovymi vučeńniami». Mintrans Litvy prakamientavaŭ skasavańnie rejsaŭ ź Biełarusi
Kiraŭnica adździeła kamunikacyjaŭ Ministerstva transpartu Litvy Asta Dudurycie adkazała na pytańnie karespandenta telekanała «Biełsat» adnosna pryčyn skasavańnia rejsaŭ pamiž Minskam i Vilniaj.
Asta Dudurycie adznačyła, što ŭ suviazi z pastanovaj urada Litvy ab nadzvyčajnym stanoviščy mižnarodnyja aŭtobusnyja maršruty abmiežavanyja da 29. Na kožnym maršrucie dazvoleny tolki adzin rejs u kožny bok na adnym aŭtobusie.
«Hetaja miera ŭstanaŭlivaje novaje patrabavańnie: raniej dazvoły davali mahčymaść vykonvać bolš rejsaŭ i byli sapraŭdnyja da zakančeńnia ich terminu. Z momantu nabyćcia pastanovaj mocy Administracyja transpartnaj biaśpieki Litvy (dalej — LTSA) vydała dazvoły dvum novym maršrutam pavodle novych praviłaŭ. Źmieny ŭ inšych maršrutach nie byli ŭniesienyja», — adznačyła Dudurycie.
Jana paviedamiła, što ŭsia infarmacyja pra maršruty i terminy dziejańnia dazvołaŭ publikujecca na sajcie LTSA i davodzicca da punktaŭ pamiežnaha kantrolu, jakija dapamahajuć zabiaśpiečvać vykanańnie praviłaŭ. Ciapier dziejničaje 29 aktyŭnych maršrutaŭ, pa jakich u cełym robicca 31 rejs u adzin bok. Na pamiežnym punkcie «Miedniki» za sutki pierasiakajuć miažu 44 aŭtobusy — pa 22 u kožny bok. Na punkcie «Salečniki» za sutki pierasiakajuć miažu 18 aŭtobusaŭ — pa 9 u kožny bok.
«LTSA adznačyła, što pierasiakaje miažu bolš aŭtobusaŭ, čym dazvolena, i pieravozčyki byli papiaredžanyja pra nieabchodnaść vykonvać patrabavańni svaich dazvołaŭ. Hetaje papiaredžańnie, padobna, było efiektyŭnym, bo kolkaść aŭtobusaŭ źniziłasia da dapuščalnaha ŭzroŭniu», — paviedamiła pradstaŭnica Mintransu Litvy.
Pry hetym jana padkreśliła, što hetyja miery nijakim čynam nie źviazanyja z vajskovymi vučeńniami Rasiei i Biełarusi «Zachad-2025» abo z vajskovymi vučeńniami ŭ Litvie.
Z 12 žniŭnia pasažyrski pieravozčyk Eurolines admianiŭ niekatoryja rejsy ź Vilni ŭ Minsk i nazad. Pra časovaje skasavańnie rejsaŭ u Vilniu z 14 žniŭnia paviedamiŭ i «Minsktrans».
Eurolines zajaviŭ, što pryčynaj stali vajskovyja vučeńni ŭ Litvie Aršus Vilkas 2025, jakija prachodziać kala biełaruskaj miažy z 11 da 20 žniŭnia. U «Minsktransie» karespandentu «Biełsata» paviedamili, što rejsy skasavanyja «ŭ suviazi z zakančeńniem dziejańnia dazvolnych dakumientaŭ».
Kamientary