Rasijski dypłamat, jaki zahinuŭ na Kipry, chutčej za ŭsio, pracavaŭ na HRU. Mahčyma, jon chacieŭ pierabiehčy na Zachad
Jak vynikaje z kiprskaha dypłamatyčnaha śpisu, pamierłym źjaŭlajecca treci sakratar pasolstva RF Alaksiej Panoŭ, čyja śmierć papiarednie razhladajecca jak samahubstva, paviedamlaje telehram-kanał «Echo».
Daśledčyk rasijskaha ŭpłyvu za miažoj Dźmitryj Chmialnicki paviedamiŭ «Echu», što, pavodle jaho krynic, 41‑hadovy Panoŭ byŭ aficeram HRU ŭ zvańni kapitana. Da nakiravańnia na Kipr jon, jak śćviardžajecca, pracavaŭ u Maskvie ŭ instytucie, źviazanym z radyjotechnikaj, dzie, mahčyma, pracavała i jahonaja žonka.
U pasolstvie Panoŭ, na dumku ekśpierta, zajmaŭsia absłuhoŭvańniem špijonskaha abstalavańnia — jak na terytoryi dypmisii, tak i, vierahodna, pa-za jaje miežami.
Chmialnicki źviartaje ŭvahu na padazronyja abstaviny vakoł śmierci dypłamata: Panoŭ pamior 8 studzienia, ale pasolstva paviedamiła pra heta tolki praz čatyry dni. Pry hetym kiprskuju palicyju nie dapuścili na terytoryju pasolstva i nie pieradali joj pieradśmiarotnuju zapisku, jakuju nibyta pakinuŭ zahinuły.
Na dumku ekśpierta, kali b havorka išła vyklučna pra asabistyja pryčyny samahubstva, nie było b patreby tak doŭha chavać infarmacyju. Jon miarkuje, što mahli isnavać surjoznyja abstaviny, z-za jakich išli kansultacyi z Maskvoj, i nie vyklučaje viersiju, što Panoŭ moh rychtavać ucioki, jakija byli raskrytyja i spynienyja — što, pavodle jaho słoŭ, charakterna dla savieckich i rasijskich śpiecsłužbaŭ.
Chmialnicki taksama adznačyŭ, što rasijskija pasolstvy ŭžo daŭno vykonvajuć chutčej raźviedvalnyja funkcyi, čym dypłamatyčnyja, a ciapier, kali kłasičnaja dypłamatyja faktyčna źviedziena da minimumu, raźviedka stała amal adzinym ich zaniatkam. Jon dadaŭ, što tolki daradcaŭ — pasad, jakija adpaviadajuć zvańniu pałkoŭnika, — u rasijskim pasolstvie na Kipry naličvajecca vosiem čałaviek, nie ličačy sakrataroŭ roznych uzroŭniaŭ.
Pry hetym ekśpiert paviedamiŭ, što nie maje źviestak pra mahčymaje źniknieńnie na Kipry byłoha kiraŭnika «Urałkalija» Uładzisłava Baŭmhiertniera napiaredadni śmierci Panova i nie moža paćvierdzić suviaź pamiž hetymi padziejami.
Aficyjnuju pryčynu śmierci Panova rasijskija ŭłady tak i nie nazvali. U zajavie pasolstva, dzie paznačanyja tolki jaho inicyjały biez paznačeńnia pasady, śmierć dypłamata nazvana «hłyboka asabistaj trahiedyjaj dla rodnych i blizkich». Publičnaj infarmacyi pra Panova ŭ adkrytych krynicach amal niama.
Ciapier čytajuć
18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć44
Kamientary
Nie, kab zrabić niedzie majontak u cichim miescy jak francuzy, a voś pasiarod vulicy hety treš. Kab usie navokał viedali... zdieś ruski duch, zdieś ruśsiu pachniet