Kaleśnikava raspaviała, čamu jana admoviłasia ad sustrečy z Łukašenkam u SIZA KDB
Juryj Dudź u intervju z Maryjaj Kaleśnikavaj spytaŭ, čamu jaje nie było na sustrečy z Alaksandram Łukašenkam u SIZA KDB 10 kastryčnika 2020 hoda.
Maryja skazała, što jaje nie było tam, tamu što jana admoviłasia.
— Sustreča była ŭ subotu. Napeŭna, u piatnicu ŭnačy da mianie pryjechali… Mnie vielmi nie spadabałasia sama ideja taho, što ŭnačy mianie vyvodziać u niejkija tam, nie viedaju, dziŭnyja kalidory, ja kamunikuju ź dziŭnymi ludźmi, jakija navat nie mohuć pradstavicca, i pry hetym jany tam zadajuć mnie pytańnie pra mahčymaść pajechać na sustreču.
Dudź spytaŭ, ci skazali joj, z kim budzie sustreča. Kaleśnikava adkazała, što tak.
— Heta było praź miesiac paśla majho zatrymańnia. Mnie padałosia, što heta vielmi niejak, nu, niapravilna. Niapravilna ŭ tym płanie, što, nu, što za farmat? To-bok vy mianie pasadzili, tut pryjazdžajecie da mianie ź niejkimi dziŭnymi razmovami ŭnačy. A ja nie razumieju, chto vy takija. Vy čahości ad mianie chočacie. Ja navat tady jašče skazała achoŭnikam u turmie: «Słuchajcie, vy pavinny mianie, uvohule, abaraniać voś ad usich hetych ludziej. Raz ja siadžu ŭžo ŭ turmie, usio, kab užo nichto da mianie siudy bolš nie prychodziŭ. Chopić ź mianie, užo pakamunikavała. Nu voś ja admoviłasia».
Dudź udakładniŭ, ci jana adzinaja z zatrymanych lidaraŭ pratestu, chto tudy nie pajšoŭ?
— Ja dumaju, što ja adzinaja, kaho spytali. A ja dumaju tak, tamu što ja praktyčna ŭpeŭnienaja, što niechta b taksama admoviŭsia, kali b była takaja mahčymaść, ale ja dumaju, što nichto navat nie viedaŭ, kudy jany ŭsie iduć.
Kamientary