Izrail vyvozić z uskrajku Indyi supolnaść, jakuju ličać adnym sa «stračanych kalen» Izrailevych. Zaadno rašajecca pytańnie pracoŭnych ruk

U adnym z addalenych pasieliščaŭ na paŭnočnym uschodzie Indyi kala miažy z Mjanmaj, dzie panuje subtrapičny klimat i stajać bambukavyja chaty, ludzi vyvučajuć Toru, molacca i sprabujuć zachoŭvać jaŭrejskija tradycyi. Jany mienš zakłapočanyja pytańniem histaryčnaj dakładnaści svajho pachodžańnia, čym zachavańniem viery.

Pradstaŭniki supolnaści Bniej-Mienaše vierać, što źjaŭlajucca naščadkami Manasii — cara Iŭdziei, vyhnanaha kala 2800 hadoŭ tamu, i što ich prodki prajšli praz Aziju, pakul nie apynulisia ŭ džunhlach, za bolš čym 5700 kiłamietraŭ ad Izraila.

Z padrabiaznaściami hetaj historyi i maštabnaj repatryjacyi znajomić The New York Times.

Antrapołahi staviacca da lehiendy pra pachodžańnie mienaše skieptyčna. Mienaše naležać da naroda kuki, ich movy ŭvachodziać u tybieta-birmanskuju hrupu, a karani viaduć u rajony sučasnaha Kitaja. Bolšaść kuki pryniali chryścijanstva ŭ pačatku XX stahodździa pad upłyvam amierykanskich misijanieraŭ.

Tym nie mienš, jak adznačajuć aŭtary, u 1970‑ch hadach izrailskija antrapołahi źviarnuli ŭvahu na padabienstva niekatorych miascovych tradycyj da jaŭrejskich: pieśni, lehiendy pra vychad ź Jehipta i navat vykryki padčas stychijnych biedstvaŭ, padobnyja da słova «Manasija». Z taho času hetaja supolnaść pačała ŭsprymacca jak adno z «zhublenych kalenaŭ».

Kiraŭnik Rady Bniej Mienaše Indyi U. Ł. Chanhšynh (W.L. Hangshing) pryznaje, što navukovych dokazaŭ mała. Ale, jak jon śćviardžaje, heta i nie dziŭna: «My nazyvajemsia zhublenym kalenam — i zhubleny značyć zhubleny». Sproby znajści hienietyčnaje paćvierdžańnie, na jaho dumku, biessensoŭnyja: «Heta moža zrabić tolki Boh».

Choć dokazy ich pachodžańnia vyhladajuć sprečnymi, Izrail hatovy pryniać ich «doma», ale z adnoj umovaj: pa prybyćci ŭ krainu jany pavinny prajści hijur — aficyjny abrad pryniaćcia iŭdaizmu, kab źniać usie pytańni nakont ich statusu.

Jak piša NYT, usiaho siońnia naličvajecca kala 10 000 pradstaŭnikoŭ Bniej-Mienaše — jany žyvuć u indyjskich štatach Manipur i Mizaram, a taksama ŭ Izraili, kudy amal pałova supolnaści pierabrałasia pačynajučy z 1990‑ch hadoŭ. Častka pieršych pierasialencaŭ apynułasia, u pryvatnaści, u Chieŭronie na Zachodnim bierazie i ŭ izrailskich pasieliščach u Hazie (da 2005 hoda).

U listapadzie minułaha hoda ŭrad Izraila pahadziŭsia dapamahčy astatnim 5800 pradstaŭnikam supolnaści pierajechać u krainu. Heta zdarycca da 2030 hoda, a 1200 pierajeduć užo sioleta, uziaŭšy na siabie častku vydatkaŭ. U miežach apieracyi «Kryły śvitańnia» pry kancy krasavika izrailskija ŭłady arhanizujuć pieralot dla prykładna 250 čałaviek praz Deli ŭ Tel-Aviŭ.

Matyvacyja Izraila ŭ hetym pytańni maje nie tolki relihijny, ale i prahmatyčny składnik. Premjer-ministr Bieńjamin Nietańjachu nazyvaje padtrymku hetaj emihracyi «važnym sijanisckim rašeńniem», jakoje dapamoža ŭmacavać poŭnač krainy i Halileju — rehijony, jakija pakutujuć ad abstrełaŭ «Chiezbały».

Akramia taho, Izrail vostra maje patrebu ŭ pracoŭnych rukach. Vajna, jakaja pačałasia paśla napadu CHAMAS 7 kastryčnika 2023 hoda, pryviała da mabilizacyi značnaj častki nasielnictva, adtoku mihrantaŭ ź Niepała i Tajłanda, a taksama zabarony na pracu dla paleścincaŭ.

Bolšaść mienaše ŭ Indyi zajmajucca sielskaj haspadarkaj abo pracujuć na padzionnych pracach, u toj čas jak u Izraili jany časta stanoviacca kiroŭcami, budaŭnikami abo rabočymi na fabrykach. Pierachod ad ahrarnaha žyćcia da vysokatechnałahičnaha hramadstva, jak adznačaje adna z pradstaŭnic supolnaści Džesika Tanhžom (Jessica Thangjom), zusim nie prosty.

Pavialičyć

Sami pierasialency kirujucca jak duchoŭnymi, tak i sacyjalnymi pryčynami. U Manipury mienaše žyvuć u vielmi ścipłych umovach: siaredni dachod na dušu nasielnictva tam składaje ŭsiaho kala 1200 dalaraŭ za hod, u toj čas jak u Izraili hety pakazčyk pieravyšaje 55 000 dalaraŭ. Adnak hałoŭnym stymułam jany nazyvajuć relihiju. U indyjskich džunhlach im ciažka vykonvać usie zapaviety iŭdaizmu, znachodzić dastatkova ludziej dla malitvaŭ (mińjan) ci kuplać kašernyja pradukty.

Jak adznačaje NYT, unutranaja situacyja ŭ Manipury taksama padšturchoŭvaje ludziej da adjezdu. Z 2023 hoda štat achopleny žorstkim etničnym kanfliktam pamiž narodam kuki (da jakoha naležać mienaše) i etničnaj bolšaściu miejtej. Hetaja vajna ŭžo pryviała da šmatlikich achviar, razbureńnia damoŭ i źjaŭleńnia zakrytych zon, jakija niemahčyma pierasiekčy. 

Niahledziačy na toje, što Izrail sam znachodzicca ŭ stanie pastajannaj napružanaści i vajny, mnohija pradstaŭniki supolnaści hatovyja jechać tudy luboj canoj.

«My vierym u Toru. My całkam daviarajem izrailskamu ŭradu. Jany paabiacali, što ŭsie Bniej-Mienaše pierajeduć u Izrail da 2030 hoda. U nas va ŭsich užo hatovyja pašparty», — cytuje vydańnie adnaho z pradstaŭnikoŭ supolnaści.

• 10
• 0
• 7
• 1
• 1
• 0
• 0
• 0