Finlandyja, Danija, Narviehija. Abo Hrecyja ci Francyja? Top sioletniaha «Jeŭrabačańnia»

Finlandyja: Linda Lampenius i Pete Parkkonen — Liekinheitin

Finlandyja viazie na Jeŭrabačańnie sapraŭdny chit. Bukmiekiery prahnazujuć hetaj pieśni pieršaje miesca. U treku Liekinheitin skambinavali zapaminalnuju miełodyju na miažy roka z tancavalnaj muzykaj, vakał śpievaka Piecie Parkaniena i žyvuju ihru na skrypcy suśvietna viadomaj skrypački Lindy Łampienijus. 

Hrecyja: Akylas — Ferto

Dla sioletniaha vystupu hreki prapanujuć chutkuju tancavalnuju muzyku z nacyjanalnymi matyvami. U hetuju abhortku jany schavali jarki sacyjalny tekst. Ferto ad repiera Akylas — pieśnia pra čałaviečuju prahnaść i imknieńnie spažyvać bolš čym treba, jakoje idzie ad pustaty ŭ čałaviečaj dušy. A jašče Akylas — adzin z tych typova jeŭrabačanskich dzivakoŭ. 

Danija: Søren Torpegaard Lund — Før vi går hjem

Dacki pradstaŭnik Sioren Torpiehar adkazvaje na sioletnim «Jeŭrabačańni» za jakasnuju pop-muzyku. Na konkurs jon pradstavić piecniu Før Vi Går Hjem. Padčas nacyjanalnaha finału Sioren śpiavaŭ u šklanym boksie ź nieonam, dymam i płastyčnaj padtancoŭkaj. Usie kampanienty chita dla «Jeŭrabačańnia» na miescy, ale ci chopić hetaha dla pieramohi?

Čechija: Daniel Žižka — Crossroads

Čechi jašče nikoli nie mieli pośpiechu na «Jeŭrabačańni». Za 13 hadoŭ udziełu jany tolki piać razoŭ prabilisia ŭ finał i nikoli nie zajmali miesca vyšejšaha za šostaje. Naŭrad ci pieśnia Crossroads ad Daniela Žyžki dapamoža im pierałamać trend — nadta jana dla hetaha samabytnaja. Ale heta nie pieraškodzić nam atrymać zadavalnieńnie ad mocnaha vakału Žyžki i atmaśfiernaj muzyki.

Izrail: Noam Bettan — Michelle

Noam Bietan sioleta skradzie ŭsie sercajki hladačak «Jeŭrabačańnia». Hałasisty śpiavak ź Izraila vystupić ź pieśniaj Michelle na troch movach: čakajcie iŭryt, francuzskuju i anhlijskuju movy. Hetaja pieśnia pra taksičnaje kachańnie maje takuju zapaminalnuju miełodyju, što vykinuć jaje z hałavy budzie niaprosta — a značyć, słuchačy nie zabuduć, za kaho hałasavać.

Užo nie pieršy hod jość šmat palemiki vakoł udziełu Izraila ŭ konkursie — praz bajavyja dziejańni suprać Paleściny, za jakija Izrail abvinavačvajuć u hienacydzie paleścincaŭ. Sioleta z hetaj nahody ŭ znak pratestu konkurs prapuściać Ispanija, Isłandyja, Niderłandy, Słavienija i Irłandyja.

Francyja: Monroe — Regarde!

Talenavitaja i abajalnaja Monroe vystupić ź pieśniaj u styli pop-opiera, čym padtrymaje ledź nie samy nadziejny trend «Jeŭrabačańnia» — u minułyja dva hady pieramahli pieśni ŭ tym ža styli. Budzie i jašče adzin trend, skrypka, jaki my siońnia ŭžo zhadvali vyšej. Chacia što jašče vieźci ŭ Vienu, akramia jak kłasiku? Zdajecca, Monroe usio jašče moža skłaści kankurencyju na hetym konkursie.

Narviehija: Jonas Lovv — Ya Ya Ya

Na hetym miescy moh być Alaksandr Rybak, jaki sioleta sprabavaŭ znoŭ trapić na «Jeŭrabačańnie». Ale zamiest jaho na konkurs jedzie narviežac Jonas Łov. Sa svaimi vusami, čornym kambiniezonam i charakternymi ruchami na scenie jon biessaromna kapiruje Fredzi Mierkjury. Vyjści na scenu z rok-muzykaj u hod, kali navokał panuje adna papsa i opiera — śmieła, vielmi śmieła.

Pačatak finału a 22‑j pa Minsku.

• 1
• 2
• 1
• 0
• 0
• 0
• 0
• 1