Vierbavy łabirynt, areli i ležaki. Jakija novyja zony adpačynku ŭładkujuć u Frunzienskim rajonie
Dźvie novyja zony adpačynku ŭładkujuć u Frunzienskim rajonie ŭ 2026 hodzie. Dzie mienavita i jak źmieniacca terytoryi, piša «Minsk-Naviny».
Skvier-pierachod
Pa słovach namieśnika dyrektara «Zielenbuda Frunzienskaha rajona» Aleny Kmit, u zialonym masivie ŭzdoŭž vulicy P. Hlebki abstalujuć zonu adpačynku «Viarba». Adkryćcio zapłanavana da Dnia Niezaležnaści. Tut sfarmujuć paŭnavartasny skvier ź sietkaj darožak. Staryja piešachodnyja suviazi zachavajuć, prakładuć druharadnyja ściežki ŭ miescach, dzie ludziam budzie zručna chadzić.
Hałoŭnaj łandšaftnaj asablivaściu stanuć žyvyja aharodžy ź vierbaŭ, a taksama vierbavy łabirynt. Akramia taho, pasadziać kusty i drevy.
Prastoru padzielać na funkcyjanalnyja zony. Dziciačuju placoŭku i varkaŭt-zonu ŭpišuć u pryrodnaje asiarodździe. Dla spakojnaha adpačynku zrobiać miescy dla piknikoŭ i cichija kutki. Nie zabylisia pra spartyŭnuju placoŭku, viełaparkoŭku i sistemu navihacyi. Małyja architekturnyja formy — łaŭki, aharodžy, urny — vykanajuć z naturalnych materyjałaŭ, kab jany nie kantrastavali ź zialonym asiarodździem.
— Uvachodnuju hrupu aformiać u adzinaj stylistycy. Paśla adkryćcia masiŭ na vulicy P. Hlebki pieratvorycca ŭ terytoryju, dzie možna hulać, zajmacca sportam abo prosta adpačyć na śviežym pavietry, — kaža Kmit. — «Viarba» — heta skvier-pierachod: prastora pamiž zimoj i viasnoj, horadam i pryrodaj, racyjanalnym i sakralnym.
Ptušyny kutok
Da Dnia horada ŭ miežach vuł. Akademika Vyšaleskaha — Brykieta — Prytyckaha zavieršycca dobraŭparadkavańnie zony adpačynku «Kačyny vostraŭ». Skvier užo siońnia raduje žycharoŭ malaŭničym reljefam: tut jość nievialiki vadajom, płaŭnyja spuski da vady i hustaja zielanina, jakaja abaraniaje ad šumu daroh.
Vakoł sažałki zrobiać kalcavy prahułačny maršrut, jaki abjadnaje asnoŭnyja funkcyjanalnyja zony. Na vostravie i paŭvostravie zapłanavany ahladnyja placoŭki, fotazony, jakija dazvolać nazirać za ptuškami, nie parušajučy ich spakoju. Źjaviacca naściły i pirsy, nievialikija placoŭki ź ležakami i arelami, «kačyny plaž» ź piasčanym pakryćciom i naviesami. Taksama zrobiać domiki dla kačak, špakoŭni i vavioračniki.
Dapoŭniać strukturu skviera dziciačaja hulniavaja zona ŭ pryrodnym styli, varkaŭt-placoŭka, łaŭki i sučasnaja sistema raździelnaha zboru adkidaŭ.
Źjaviacca stendy ź infarmacyjaj pra žycharoŭ vadajoma i praviłami bieražlivych adnosin da pryrody.
— My chočam stvaryć cichaje miesca, dzie žychary zmohuć atrymlivać asałodu ad prahułak, lubavacca pryrodaj, bavić čas ź siamjoj i dziećmi. Heta budzie šmatfunkcyjanalnaja hramadskaja prastora, jakaja spałučaje adpačynak i ekałahičnuju aśvietu. Hałoŭny akcent — harmonija vady, zielaniny i faŭny, — tłumačyć Kmit.
Ciapier čytajuć
Kadebešniki telefanujuć biełarusam u emihracyi praź ich siabroŭ — čaho chočuć?5
Kamientary