Padazravanaja ŭ zamachu na ŭkrainskaha bujnoha biznesmiena ŭ Manaka — ukrainka
Jana maskiravałasia, kab vyhladać, jak mužčyna.
Hałoŭnym padazravanym ŭ vybuchu ŭ Manaka, u vyniku jakoha paciarpieli bujny ŭkrainski biznesmien Vadzim Jermałajeŭ i jaho siamja, akazałasia žančyna ŭkrainskaha pachodžańnia. Pra heta paviedamlaje «Jeŭrapiejskaja praŭda» sa spasyłkaj na inšyja ŚMI.
Padazravanuju, jakaja pakinuła torbu z vybuchoŭkaj kala budynka, znajšli ŭ adnoj ź jeŭrapiejskich krain (nie Manaka i nie Francyja).
«Zhodna z našymi dadzienymi, z ulikam faktaŭ, sabranych padčas rasśledavańnia, hety čałaviek, imavierna, maskiravaŭsia, kab vyhladać jak mužčyna», — havorycca va ŭnutranaj natatcy palicyi Manaka, ź jakoj udałosia aznajomicca BFMTV.
Le Figaro dadaje, što padazravanaja — ukrainskaha pachodžańnia.
U dzień zdareńnia jana niekalki razoŭ pravodziła raźviedku miascovaści, paviedamlajuć ŚMI.
Niezadoŭha da vybuchu hetaja asoba zaŭvažyła siamju Jermałajevych u rajonie płoščy de Miulen i vyrašyła prasačyć za joj.
Jana abahnała ich i spyniłasia prykładna za 10 mietraŭ napieradzie. Zatym nakiravałasia da doma siamji, padniałasia na try prystupki pierad uvachodam i pastaviła torbu z bombaj.
Paśla hetaha jana paśpiešliva pakinuła miesca zdareńnia, azirnuŭšysia, kab pierakanacca, što siamja sapraŭdy ŭvajšła ŭ budynak. 13‑hadovy chłopčyk, jaki atrymaŭ ranieńnie ŭ vyniku vybuchu, pieršym zajšoŭ u budynak.
I mienavita ŭ toj momant, kali Hanna Nasobina, partniorka biznesmiena Jermałajeva, prachodziła mima torby, padazravanaja dystancyjna ŭzarvała jaje «z dapamohaj pryłady, padobnaj na pult dystancyjnaha kiravańnia».
Na dadzieny momant stan Hanny Nasobinaj zastajecca krytyčnym. Joj amputavali abiedźvie nahi.
Akramia taho, u dačynieńni da padazravanaj vydadzieny jeŭrapiejski ordar na aryšt. Taksama pačata sudovaje rasśledavańnie pa artykułach «zamach na zabojstva i saŭdzieł», «ustanoŭka vybuchovaj pryłady ŭ hramadskim miescy sa złačynnym namieram i saŭdzieł» i «złačynnaje abjadnańnie».
ŚMI pisali, što śledstva ŭ Manaka ličyć, što da vybuchu mahła być datyčnaja Słužba biaśpieki Ukrainy.
Padazravanaja — 39‑hadovaja Anastasija Bierazoŭskaja. Jana žyła ŭ niamieckim Frankfurcie. Na pravaj ruce ŭ jaje tatu źmiai.
Nahadajem, 29 červienia kala 21:00 u vyniku vybuchu ŭ Manaka paciarpieli try čałavieki, dvoje ź jakich atrymali vielmi ciažkija ranieńni. Pavodle źviestak ŚMI, havorka idzie pra bujnoha ŭkrainskaha biznesmiena Jermałajeva i jaho blizkich.
Vadzim Jermałajeŭ — biznesmien z Dniapra, zasnavalnik handlova-vytvorčaj karparacyi «Alef» i adzin z najbujniejšych zabudoŭščykaŭ horada. Raniej jon rehularna ŭvachodziŭ u śpis 100 samych bahatych ludziej Ukrainy pa viersii Forbes. U 2019 hodzie jon admoviŭsia ad ukrainskaha hramadzianstva na karyść kiprskaha pašparta.
U 2023 hodzie Rada nacyjanalnaj biaśpieki i abarony Ukrainy ŭviała suprać jaho sankcyi terminam na 10 hadoŭ. Pa słovach ukrainskich uładaŭ, hetyja miery byli źviazanyja, u pryvatnaści, z abvinavačańniami ŭ tym, što častka jaho biznesu praciahvała dziejnaść u anieksavanym Krymie paśla 2014 hoda.
Sam Jermałajeŭ publična admaŭlaŭ hetyja abvinavačańni.
Starejšy syn Jermałajeva, Artur, stvaryŭ sietku machlarskich koł-centraŭ, jakija padmanvali žycharoŭ ES.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski1313
Kamientary
Pa-druhoje, vy, moža, z tych, chto ščyra vieryć, što ŭkrainskim aliharcham, bujniejšym zabudoŭščykam adnaho z bujniejšych haradoŭ krainy i h.d. moža stać čałaviek, na čyich rukach niama złamanych losaŭ (upeŭnieny, što i stračanych žyćciaŭ) mnohich ludziej?
Pa-treciaje, vy sapraŭdy dumajecie, što jahony starejšy synok vybudavaŭ svoj złačynny "biźnies" biez udziełu i ŭpłyvu baćki?
Pa-čaćviortaje, kali pravasudździe nie moža daciahnucca da takich m@dakoŭ, ja asabista nie suprać takich varyjantaŭ zaviaršeńnia ich "karjery".
Dumaju, na hetym možna spynicca.