«Ździek z žyvych istot». Biełarusy aburanyja ŭmovami dla katoŭ na vystavie «Murfest» u stalicy
19 vieraśnia ŭ handlova-zabaŭlalnym centry «Červieński» ŭ Minsku pačała pracu kantaktnaja vystava katoŭ «Murfest». Užo na nastupny dzień nieabyjakavyja ludzi pačali bić tryvohu za vystaŭlenych tam žyvioł.
Pa słovach naviednikaŭ, katy ŭžo vyhladajuć zmučanymi, chacia vystava anansavała pracu da 8 listapada ŭklučna. Da hetaha ž tyja samyja žyvioły pabyvali z «hastrolami» ŭ Rasii, dzie arhanizatary taksama sutyknulisia z krytykaj i zaklikami spynić hety ździek. A ŭ Čalabinsku miascovyja ŭłady navat zabaranili praviadzieńnie vystavy «Murfest», zafiksavaŭšy parušeńni ŭ transpartavańni i raźmiaščeńni čatyrochłapych.
Biełarusy, jakija ŭžo paśpieli naviedać «Murfest», apaviadajuć, što pad pryhožaj abhortkaj jany pabačyli žadańnie arhanizataraŭ nažycca na biednych katach, jakija pierabiahajuć z kuta ŭ kut u nadziei znajści supakoj.
«Zmučanyja, nibyta pad uździejańniem siedatyŭnych preparataŭ — katy ci śpiać, ci imknucca ŭciačy ad dziaciej, jakija niaspynna ich ciskajuć ci tykajuć u ich pałkami», — padzialiłasia nazirańniami ŭ Threads adna z naviednic.
«Niekatoryja vyhladajuć chvaravitymi, vielmi ŭstryvožanymi, jany ŭ stanie stresu».
«Čamu nichto na vystavie nie kantraluje abychodžańnia z žyviołami?» — zadajecca pytańniem jašče adna biełaruska, na svaje vočy pabačyŭšy, jak arhanizatary praihnaravali ahresiŭnuju reakcyju kata na dotyki čarhovaha naviednika.
Vyklikała ŭ naviednikaŭ pytańnie i sama prastora dla katoŭ u HC.
«Pad hety «Murfiest» arandavanaje pamiaškańnie ź bietonnaj padłohaj, zamiest ścienak tam baniery. A kali ty tudy zachodziš, to bačyš nie katoŭ, a vielizarny natoŭp ludziej vakoł ich», — dzielicca ŭražańniami jašče adna biełaruska. «U centry — kipciuradziorki, domiki, biehavaja darožka i ŭsiaho try ci čatyry łatki na ŭsio pamiaškańnie (niekatoryja navat nie ačyščanyja), prykładna stolki ž paiłak. Pry tym što katoŭ tam niedzie 13‑15».
Pa słovach vidavočcy, adpačynak dla katoŭ praduhledžany vyklučna ŭ kletkach, ale tolki tady, kali jaho dazvolać supracoŭniki vystavy.
«Murfest» pracuje ŭ stalicy štodzionna, akramia paniadziełka, z 11:00 da 20:00. Z takim hrafikam žyvioły ŭsiaho raz na tydzień mohuć paŭnavartasna adpačyć ad patoku ludziej, jakija chočuć ich pałaščyć, bo zapłacili za toje hrošy. Kvitki na «Murfest» kaštujuć ad 24 da 26 rubloŭ — usio heta padajecca jak «kotaterapija», adnak dla samich katoŭ tut pryjemnaha mała.
«Kali ŭličvać, što da pryjezdu ŭ Minsk tyja ž katy pabyvali na hastrolach u Rasii, to heta vyhladaje jak žudasnaja ekspłuatacyja, jakaja moža pryvieści da chvarob na fonie stresu», — kaža vieterynar.
U Rasii arhanizacyja «Murfestu» karaniami ciahniecca da pradprymalnika Juryja Tkačenki z Saratava (mienavita jamu admovili ŭ svoj čas u licenzii ŭ Čalabinsku).
U Minsku za pryvoz katoŭ na terytoryju Červienskaha HC adkaznaja kampanija «Ekzibit», zarehistravanaja ŭ Biełarusi z 2024 hoda i asnoŭnaja dziejnaść jakoj — «arhanizacyja adpačynku i zabaŭ».
Žurnalist «Našaj Nivy» źviarnuŭsia da arhanizataraŭ «Murfesta» ŭ Minsku jak pryvatnaja asoba.
«Chočam zapeŭnić vas, što vystava stroha vykonvaje ŭsie normy i praviły, skiravanyja na zabieśpiačeńnie dabrabytu žyvioł i kamfort naviedvalnikaŭ. Usie kotki ŭ nas znachodziacca pad nazirańniem prafiesijanałaŭ, i ich zdaroŭje kantralujecca. My abmiažoŭvajem kolkaść naviedvalnikaŭ, kab stvaryć kamfortnuju atmaśfieru», — prakamientavali tam.
Pry hetym ad dadatkovaha pytańnia nakont kankretnaj dazvolenaj kolkaści naviednikaŭ arhanizatary ŭchililisia, ćmiana ŭdakładniŭšy, što «strohaha abmiežavańnia pa kolkaści naviednikaŭ niama, ale my imkniomsia rehulavać płyń ludziej».
Na aficyjnaj staroncy festa ŭ instahramie da niekatorych pastoŭ była abmiežavanaja mahčymaść kamientavańnia. Tam ža, dzie heta jašče mahčyma, niehatyŭnyja vodhuki padčyščajucca.
Ciapier čytajuć
Padpałkoŭnika z fakulteta vajskovaj raźviedki sudziać za «zdradu dziaržavie» pa spravie, jakaja vyhladaje palityčnaj. Što pra jaho viadoma?6
Kamientary