Da Japonii nabližajecca mahutny tajfun: ułady zaklikali evakujavacca dvum miljonam čałaviek

U Tokia i susiednich rajonach abvieščana ekstranaje papiaredžańnie: da ŭschodniaha ŭźbiarežža Japonii nabližajecca mahutny tajfun «Ducziuań». Ułady papiaredžvajuć pra vysokuju ryzyku pavodak i apoŭźniaŭ. Kala dvuch miljonaŭ čałaviek atrymali rasparadžeńnie evakujavacca, piša Bi-bi-si.

Pavodle danych Ministerstva ŭnutranych spraŭ Japonii, rasparadžeńnie ab evakuacyi tyčycca 1 908 645 čałaviek u šaści prefiekturach: Ibaraki, Tyba, Tokia, Kanahava, Sidzuoka i Sajtama.

Evakuacyja nie źjaŭlajecca abaviazkovaj, adnak Japonskaje mietearałahičnaje ahienctva papiaredžvaje pra niepasrednuju pahrozu žyćciu ŭ niekatorych rehijonach.

«Kali łaska, praviercie ŭzrovień ryzyki stychijnaha biedstva ŭ municypalitecie, dzie vy zaraz znachodziciesia, i evakuirujciesia da taho, jak miascovyja ŭłady abvieściać aficyjny zahad ab evakuacyi», — zaklikaŭ hałoŭny sinoptyk ahienctva Takuja Chasomi. Pavodle jaho słoŭ, tajfun akazaŭsia macniejšym, čym čakałasia.

Užo viadoma jak minimum pra troch paciarpiełych.

Pažarnaja słužba horada Jokasuka, raźmieščanaha ŭ prefiektury Kanahava prykładna ŭ paŭtary hadzinach jazdy ad Tokia, paviedamiła Bi-bi-si, što atrymała zvanok ad mužčyny, jaki raskazaŭ, što jaho dom byŭ razburany apoŭźniem. U domie znachodziłasia žančyna va ŭzroście kala 60 hadoŭ. Jaje źniesła patokam.

Pavodle pradstaŭnika słužby Jasuchira Kaneka, pravodzicca vyratavalnaja apieracyja, pry hetym na miescy zdareńnia praciahvajecca mocny doždž.

Pažarnaja słužba horada Sodehaura (prefiektura Tyba) paviedamiła Bi-bi-si, što joj udałosia vyratavać rabočaha — mužčynu va ŭzroście kala 50 hadoŭ, jaki apynuŭsia ŭ pastcy. Padčas rasčystki zavałaŭ na miescy apoŭźnia jon sarvaŭsia razam ź ciažkaj technikaj u zaraśniki bambuku. Prykładna praz try hadziny jaho vyratavali i dastavili ŭ balnicu.

U hetym ža horadzie z-za apoŭźnia lohkija traŭmy atrymała žančyna.

U Tokia paviedamlajecca pra mocny doždž, viecier i ślizkija vulicy.

Surazmoŭca z takijskaha rajona Mehura, praź jaki praciakaje adnajmiennaja raka, raskazaŭ, što ŭvieś dzień atrymlivaŭ na mabilny telefon paviedamleńni z zaklikami trymacca dalej ad vady i rekamiendacyjami evakujavacca. Pavodle jaho nazirańniaŭ, za niekalki hadzin uzrovień vady ŭ race značna padniaŭsia.

Jon taksama źviarnuŭ uvahu, što aŭtobusy i ciahniki byli amal pustymi. Žychary Mehura atrymali na mabilnyja telefony papiaredžańnie čaćviortaha, druhoha pa ŭzroŭni niebiaśpieki, uzroŭniu ryzyki pavodak i apoŭźniaŭ. Takoje ž papiaredžańnie dziejničaje dla paŭnočnaj častki astravoŭ Idzu, a taksama prefiektur Tyba, Kanahava i Sidzuoka.

Piaty, najvyšejšy ŭzrovień niebiaśpieki byŭ abvieščany ŭ pasiołku Osima i ŭ paŭdniovaj častcy archipiełaha Idzu na poŭdzień ad prefiektury Tokia, a krychu paźniej — u horadzie Sodehaura (prefiektura Tyba).

Tajfun užo prajšoŭ mima Idzu i na praciahu nastupnych sutak praciahnie ruch u paŭnočna-ŭschodnim napramku.

Žychary centra Tokia i papularnaha turystyčnaha rajona Sibuja atrymali papiaredžańnie treciaha ŭzroŭniu.

Pry trecim uzroŭni niebiaśpieki pažyłym ludziam, ludziam z abmiežavanymi mahčymaściami i inšym katehoryjam hramadzian rekamiendujecca evakujavacca ź niebiaśpiečnaj zony.

Upraŭleńnie pa praduchileńni stychijnych biedstvaŭ Tokia zaklikaje paźbiahać padvałaŭ: «Padvały schilnyja da zatapleńnia, a pakolki ź ich nie vidać, što adbyvajecca zvonku, isnuje ryzyka apynucca ŭ pastcy».

Taksama varta aścierahacca nakryvak kanalizacyjnych lukaŭ: padčas pavodki ich moža zrušyć patok vady.

• 0
• 0
• 0
• 0
• 0
• 0
• 0
• 0