Dumajecie, ptušyny pamiot možna pakinuć da nastupnaha myćcia mašyny? Oj nie

Ptušyny pamiot na mašynie — zvyčajnaja reč, asabliva kali jana staić pad drevami. Čaściej za ŭsio takuju plamu nie ŭsprymajuć jak niešta terminovaje. Kali nie pieraškadžaje, možna jeździć da myjki abo zmyć pry nahodzie. Adnak, jak papiaredžvajuć śpiecyjalisty niamieckaha aŭtamabilnaha kłuba ADAC, navat nievialikaja plama ptušynaha pamiotu moža surjozna paškodzić łakafarbavaje pakryćcio.

Prablema ŭ tym, što ptuški nie nadta pieraborlivyja ŭ ježy: jaduć čarviakoŭ, vusieniaŭ, drobnych žyvioł, nasieńnie, jahady, a časam i reštki čałaviečaj ježy. Usio heta pieratraŭlivajecca z dapamohaj davoli ahresiŭnaj straŭnikavaj kisłaty. U vyniku ŭ pamiocie zastajucca rečyvy, jakija škodziać sučasnym aŭtamabilnym łakam: mačavaja i inšyja kisłoty, jedkija pradukty raspadu białkoŭ, a taksama minieralnyja prymiesi, naprykład, piasčynki.

Tak, daśledavańnie, apublikavanaje ŭ Journal of Coatings Technology and Research, pakazała, što stravavalnyja fiermienty, jakija źmiaščajucca ŭ ptušynym pamiocie, zdolnyja vyklikać chimičnaje razbureńnie prazrystaha achoŭnaha słoja aŭtamabilnaj farby.

Asabliva niebiaśpiečna pakidać takoje zabrudžvańnie na mašynie ŭ śpiakotu. Pry vysokaj tempieratury, adznačajuć u ADAC, časam dastatkova ad 10 da 20 chvilin, kab pamiot pačaŭ paškodžvać vierchni prazrysty słoj łaku. Paśla vydaleńnia plamy na hetym miescy mohuć zastacca biełyja abadki.

Kali ptušyny pamiot zastajecca na kuzavie daŭžej, jon moža paškodzić užo hłybiejšyja słai pakryćcia. Jany stanoviacca krochkimi i pačynajuć treskacca, a prazrysty słoj łaku moža navat adździalicca ad słoja farby. Tady vilhać i kisłoty atrymlivajuć mahčymaść pranikać jašče hłybiej, i adnaho vydaleńnia plamy abo paliroŭki moža być niedastatkova. U takim vypadku daviadziecca źviartacca da śpiecyjalista, a paškodžanaje miesca, mahčyma, navat pierafarboŭvać.

Nie harantujuć doŭhaterminovaj abarony i vaskovyja abo kieramičnyja pakryćci. Ptušyny pamiot davoli chutka pačynaje ŭździejničać i na ich, a z časam moža razburyć achoŭny słoj. Tamu ŭ ADAC rajać rehularna ahladać mašynu na najaŭnaść ptušynaha pamiotu.

Jak pravilna prybrać ptušyny pamiot

Sa śviežym pamiotam usio adnosna prosta. Jaho lepš zmyć vialikaj kolkaściu vady. A voś adrazu cierci plamu anučaj abo survetkaj nie varta. U pamiocie mohuć być piasčynki i inšyja ćviordyja čaścinki, jakija pry treńni padrapajuć łak.

Kali pamiot užo zasoch, jaho spačatku treba raźmiahčyć. ADAC raić pakłaści na plamu mokruju tkaninu, anučku abo miakkuju hubku i pakinuć jak minimum na 15 chvilin. Možna skarystacca i staroj hazietaj: skłaści jaje ŭ niekalki słajoŭ, pakłaści na zabrudžanaje miesca i dobra namačyć ciopłaj vadoj. Papiera prylipaje navat da viertykalnaj pavierchni, a dla śviežaha pamiotu zvyčajna dastatkova 5‑10 chvilin. Dla razmočvańnia padyduć i vilhotnyja survetki ź miakkimi ačyščalnymi kampanientami.

Kali pamiot mocna prysoch, možna skarystacca śpiecyjalnym srodkam dla vydaleńnia śladoŭ nasiakomych, aŭtamabilnym šampuniem abo miakkim srodkam dla myćcia posudu. A voś srodak dla myćcia škła nie rekamiendujecca: ad jaho łak moža stać matavym. Kali zabrudžvańnie dobra razmokła, jaho treba jak maha lepš zmyć vadoj, a reštki aściarožna pramaknuć vilhotnaj anučkaj ź mikrafibry.

U darozie moža vyratavać zvyčajnaja płastykavaja butelka z vadoj. Kali zrabić u nakryŭcy nievialikuju adtulinu, atrymajecca macniejšy strumień, jakim zručniej zmyvać pamiot.

A jašče praściej zahadzia sabrać nievialiki nabor i trymać jaho ŭ bahažniku. Śpiecyjalisty rajać mieć butelku abo pulvieryzatar z vadoj i nievialikaj kolkaściu vadkaha myła, a taksama niekalki miakkich anučak ź mikrafibry.

Hałoŭnaje, ad čaho zaścierahajuć ekśpierty, — nie vykarystoŭvać žorstkija ščotki i kuchonnyja hubki i nie sprabavać adskrebci zasochły pamiot. Pryncyp prosty: spačatku raźmiahčyć, zatym zmyć vadoj i tolki paśla hetaha aściarožna pramaknuć reštki miakkaj tkaninaj.

• 1
• 0
• 2
• 1
• 1
• 1
• 0
• 0