Vybary Pucina jak šaniec pavyvučać ludziej

Što mianie bolš za ŭsio ŭraziła pry naziralnictvie na hetych prezidenckich vybarach u Rasii — hałasavańnie na chatach, kudy ja vypraviŭsia z paraj nastaŭničak-členak vybarčaj kamisii. Na treninhu kazali, što narmalova, kali na ŭčastku budzie čałaviek 20–30 tych, chto padaŭ zajaŭku na hałasavańnie ŭ siabie doma — zvyčajna heta piensijaniery i invalidy.

Na našym učastku zajavak na hałasavańni doma było ažno bolš za 60.

Abychodzili najcikavych ludziej, i mnohija z hetych maskoŭskich starykoŭ za tyja piać chvilinaŭ, jakija my praviali ŭ kvatery, paśpiavali raspavieści cełuju historyju svajho žyćcia.

Były deputat, jaki zasiadaŭ u miascovym saviecie 50 hod tamu, jašče kali naš spalny rajon navat nie byŭ častkaj Maskvy.

Były analityk Administracyi prezidenta («jak ža ja mahu nie prahałasavać za svajho byłoha načalnika!») i aparata Viarchoŭnaha savieta SSSR, jaki «za hady słužby ničoha nie skraŭ», a tolki zarabiŭ na dvuchpakajovuju kvateru, ščylna zastaŭlenuju knihami i niedarahimi, ale piaščotna sabranymi suvienirami.

Prosta maŭklivy statny chudy staryk z ładnaju baradoj i cyharetaj u chudych palcach — jak ažyły čorna-bieły mastacki fotazdymak.

Siamiejnaja para, što žyvie razam užo 63 hady, vieterany Druhoj suśvietnaj.

Kabieta, što naradziłasia jašče pierad Kastryčnickaj revalucyjaj, amal ślapaja i amal hłuchaja, jakaja žyvie sama.

Staraja minijaturnaja nastaŭnička matematyki z redkim habrejskim imiom, jakaja adna z troch, kaho my abyšli, prahałasavała nie tak, jak jaje prainstuktavali supracoŭniki sacyjalnaj słužby.

Jak redka sustrenieš takich ludziej u svaim štodzionnym žyćci.

Naviedniki vybarčaha ŭčastku taksama cikavy zrez hramadstva.

Vybary — badaj što adzinaje mierapryjemstva, dzie razam źbirajucca ŭsie žychary rajonu:

Rasija — narmalnaja kraina z narmalnymi ludźmi. Ludźmi dobrymi, chaj i z adpaviednaj dozaj svaich zvyčajnych čałaviečych zahanaŭ. I niejak tym bolš kryŭdna zrabiłasia, što za apošnija dvanaccać hadoŭ dla ŭłady zrabiłasia normaj tak hrebliva stavicca da volevyjaŭleńnia voś hetych kankretnych ludziej, kaho ty bačyš na svaje ŭłasnyja vočy.

* * *

Razam z trojkaj naziralnikaŭ ad Kamunistyčnaj partyi, što byli razam sa mnoj na ŭčastku, my tak i nie dačakalisia źjaŭleńnia ŭ nas sumnaviadomaj čarhi budaŭnikoŭ z admacavalnymi paśviedčańniami (mienavita tak, pavodle paviedamleńniaŭ, vyhladała typovaja «karusiel»). Vosiem hadzin viečara, dźviery začyniajucca, pačynajecca padlik.

Nikoli nie zrazumieju,

čamu ŭ XXI stahodździ, kali isnuje Microsoft Excel, padlik tych, chto prahałasavaŭ, pavinien vieścisia ŭručnuju

Padlik biuleteniaŭ prajšoŭ z drobnymi parušeńniami, ale bieź vidavočnaha machlarstva: naziralnikam dazvolili nie toje što bieśpieraškodna nazirać za stałom, na jakim išoŭ padlik, ale padpuścili sieści prama za jaho, zusim poruč z členami kamisii. Uzhadałasia, jak u 2006 hodzie ŭ Miensku my stajali mietrach u dziesiaci ad zachilenaha śpinami členaŭ kamisii stała.

Na našym učastku Pucin nabraŭ tolki 43,5% hałasoŭ. Druhoje miesca — Michaił Procharaŭ z 24%. Na susiednim učastku, jaki źmiaščaŭsia ŭ tym ža samym pamiaškańni, vynik byŭ anałahičny. Pryjemna, chacia i drobiaź. Škada, što «hałasavańnia» ŭ Dahiestanie, Čačenii i šerahu inšych rehijonaŭ chapiła, kab kampiensavać naš tutejšy maskoŭski razhuł demakratyi.

• 0
• 0
• 0
• 0
• 0
• 0
• 0
• 0