Крэмль не мае намеру працягваць дзейную дамову аб размежаванні паўнамоцтваў паміж Расіяй і Татарстанам або заключаць новую.
Пра гэта паведамілі расійскія СМІ.
Татарстан меў спецыяльную дамову з федэральным цэнтрам ад 1994 года. Яна прадугледжвала права аўтаноміі валодаць сваімі прыроднымі рэсурсамі і мець свой Нацыянальны банк. Акрамя таго, Татарстан меў сімвалічнае права выдаваць сваім грамадзянам укладку ў пашпарт на татарскай мове з гербам Татарстана.
Татарстан — расійская нацыянальная аўтаномія з самай моцнай эканомікай і свядомасцю.
Аснову гаспадаркі Татарстана складае моцная прамысловасць (КамАЗ і хімічныя заводы Казані), а таксама здабыча нафты і газу («Татнафта»).
Нацыянальная тоеснасць грунтуецца на памяці пра магутную татарскую дзяржаву Сярэднявечча — Волжскую Булгарыю.
Татары — цюркамоўны народ, але цікава, што многія з іх — русавалосыя еўрапеоіды. Татары — мусульмане, у адрозненне ад праваслаўных расейцаў.
Плошча Татарстана складае каля 67 тыс. кв. км — ён у тры разы меншы за Беларусь. Праўда, Татарстан цалкам аточаны Расеяй, не мае выхаду да мора ці іншых дзяржаў. Насельніцтва — 3,9 млн чалавек.
Татарскія карані маюць спартоўцы Марат Сафін, Рынат Дасаеў і Зінэтула Білялетдзінаў, бізнэсовец Рынат Ахметаў, акцёрка Чулпан Хаматава. Татарскага роду і былы міністр замежных спраў Беларусі Урал Латыпаў, які нарадзіўся ў татарскай вёсцы і вучыўся ў татарскай школе ў Башкартастане.
Пасля распаду СССР доля татар у насельніцтве Татарстана вырасла з 48 да 53%.
Варта адзначыць, што ў самім Татарстане жыве 2 млн татараў, а яшчэ 3 млн прадстаўнікоў гэтага этнасу расцярушаныя ў Расіі за межамі аўтаноміі. Многія з іх страцілі мову і нацыянальныя асаблівасці, захоўваючы, аднак, татарскія імёны і далёкую родавую памяць.
Сярод іншых расійскіх аўтаномій, толькі чувашы і некаторыя народы Каўказа маюць большасць у межах аўтаноміі.
У астатніх рэгіёнах карэнныя народы ператварыліся ў меншасць на ўласнай зямлі.
Цяпер чытаюць
У беларускія пашпарты і дазволы на жыхарства будуць упісваць групу крыві8
Каментары