Беларуска так злятала на Кубу, што адсудзіла поўны кошт пуцёўкі
Турыстка з Гомеля заплаціла за адпачынак на Кубе ў чатырохзоркавым гатэлі, а апынулася ў іншым — з няспраўнай сантэхнікай, зламанымі разеткамі і праблемамі з харчаваннем. Жанчына звярнулася ў суд, каб вярнуць кошт туру, піша Onlíner.
Жанчына набыла пуцёўку для сябе і сына. Паводле плану, летась яны павінны былі ляцець з Масквы ў Альгін 29 кастрычніка і вярнуцца 9 лістапада. Жыць яны павінны былі ў чатырохзоркавым гатэлі.
Але яшчэ да паездкі ўзніклі праблемы. На Кубу насоўваўся ўраган «Меліса», а аэрапорт Альгіна закрылі з 27 да 30 кастрычніка. Жанчына некалькі разоў пісала турагенту і прасіла перанесці паездку або падабраць іншы варыянт. Але ёй адказалі, што падстаў для гэтага няма.
29 кастрычніка яна прыехала ў аэрапорт Шарамецьева, але вылет затрымалі больш чым на суткі, праз гэта адпачынак стаў карацейшым.
Пры гэтым маршрут таксама змянілі: замест Альгіна самалёт павінен быў ляцець у іншы аэрапорт, а турыстка даведалася пра гэта ўжо на тэрыторыі Кубы.
Пасля прылёту высветлілася, што і гатэль будзе іншым. Замест абяцанага чатырохзоркавага гатэля жанчыну з сынам пасялілі ў іншым месцы, якога ў дамове не было.
У матэрыялах справы яго апісваюць так: «Поўная адсутнасць ежы ў часавы прамежак паміж прыёмамі ежы, наяўнасць насякомых у ежы, нумар меў закінуты выгляд, паламаныя разеткі, зламаную сантэхніку».
Жанчына фатаграфавала недахопы і адпраўляла скаргі. Яны дайшлі да тураператара — у матэрыялах справы захавалася перапіска, якая пацвярджае звароты турысткі.
Пры гэтым да пачатку паездкі ёй не паведамілі, што зменяцца маршрут, тэрміны і месца пражывання. Пра значную частку гэтых змен яна даведалася ўжо непасрэдна падчас падарожжа.
Пасля вяртання турыстка накіравала кампаніі прэтэнзію. Яна запатрабавала скасаваць дамову, вярнуць 7587,71 рубля, якія заплаціла за тур, а таксама кампенсаваць маральную шкоду.
Кампанія пагадзілася толькі з часткай патрабаванняў і прызнала, што тур быў карацейшым. Тады жанчына звярнулася ў суд.
Суд вырашыў, што турыстычная паслуга сапраўды была аказаная не так, як дамаўляліся. Змянілі маршрут, гатэль і працягласць паездкі, а ўмовы пражывання былі горшымі за абяцаныя. Гэтыя парушэнні суд прызнаў істотнымі.
Дамову ў выніку скасавалі. Турыстычнай кампаніі давядзецца вярнуць жанчыне 7587,71 рубля. Яшчэ па 500 рублёў суд прысудзіў ёй і яе сыну за маральную шкоду.
Судовая калегія па грамадзянскіх справах Гомельскага абласнога суда пакінула гэтае рашэнне без змен. Яно ўжо ўступіла ў законную сілу.
Каментары
Если б было 2 звезды, то пища была бы вообще из насекомых, а электричества не было бы совсем