Тры з пяці дэпутатаў у дэлегацыі Еўрапарламента ў Беларусь належаць да прарасійскіх рухаў Балтыі
18—19 ліпеня ў Мінску будзе знаходзіцца дэлегацыя Еўрапарламента. На чале яе стаіць паляк Богдан Здраеўскі, які ўваходзіць у фракцыю Еўрапейскай народнай партыі. Але, што цікава, тры з пяці ўдзельнікаў дэлегацыі належаць да прарасійскіх партый краін Балтыі.
У дэлегацыю ўваходзіць Таццяна Жданок з Латвіі — яна ўваходзіць у фракцыю Зялёных, але ў Латвіі займала радыкальныя прарасійскія пазіцыі ў рамках руху «За правы чалавека ў адзінай Латвіі» (Запчел).
Іншы сябар дэлегацыі — таксама з Латвіі, Андрэй Мамыкін з левацэнтрысцкай партыі «Згода», што рэпрэзентуе інтарэсы пераважна расейскамоўнага насельніцтва.
І трэці дэлегат — Вальдэмар Тамашэўскі з Выбарчай акцыі палякаў Літвы. Ягоная структура дзейнічае ў саюзе з арганізацыямі расейскай меншасці і мае няпростыя адносіны з уладамі Літвы.
Нарэшце, пяты дэлегат — хрысціянскі дэмакрат з Германіі Міхаэль Галер.
Дэлегацыя мае адбыць сустрэчы ва ўрадзе і парламенце, а таксама з прадстаўнікамі грамадзянскай супольнасці і апазіцыі.
Еўрапарламент не мае непасрэднага ўплыву на рашэнні краін ЕС ці бягучую дзейнасць Еўракамісіі, але адыгрывае істотную кансультатыўную і сімвалічную ролю.
Каментары