Кліматычны крызіс прымушае палярных мядзведзяў спарвацца з грызлі — атрымліваюцца «пізлі»
Даследчыкі мяркуюць, што гэта пагражае біяразнастайнасці.
У 2006 годзе ў Канадзе знайшлі незвычайнага белага мядзведзя: на яго шэрсці былі бурыя плямы, а пыса мела незвычайную форму. Паляўнічыя застрэлілі мядзведзя, і аналіз ДНК пацвердзіў здагадку навукоўцаў: гэта быў гібрыд белага мядзведзя і грызлі.
У 2010 годзе ў тым жа арктычным рэгіёне Канады застрэлілі яшчэ аднаго мядзведзя, у якога маці была гібрыдам, а бацька — грызлі, піша The Independent.
Гэта былі першыя зафіксаваныя выпадкі з’яўлення «пізлі», або «гролараў» (ад англ. grizzly + polar). За апошняе дзесяцігоддзе навукоўцы заўважылі павелічэнне колькасці гібрыдных мядзведзяў. Прычына таму, на думку даследчыкаў, змены клімату.
Тэмпература ў Арктыцы павышаецца ўдвая хутчэй, чым у іншых рэгіёнах. Рэзкія змены надвор’я ў Арктыцы скарачаюць плошчу льдоў — месцажыхарыства белых мядзведзяў. З іншага боку, тэрыторыі, дзе жывуць грызлі, павялічваюцца ўглыб на поўнач. У выніку арэалы пражывання абодвух відаў пачынаюць перасякацца.
Больш за тое, згодна з апошнім даследаваннем, клімат значна ўплывае на рацыён палярных мядзведзяў, якія з’яўляюцца драпежнікамі і палююць на цюленяў. Даследчыкі асцерагаюцца, што белыя мядзведзі могуць не паспець прыстасавацца да новых арэалаў пражывання.
Усё часцей белым мядзведзям прыходзіцца шукаць альтэрнатыўныя крыніцы харчавання. У выніку ім прыходзіцца спаборнічаць за ежу з грызлі, якія ўсё хутчэй рухаюцца на поўнач. Да таго ж, абодва віды ўсё часцей спарваюцца, што можа адлюстравацца на біяразнастайнасці. Такое міжвідавае спарванне можа прывесці да знікнення або замяшчэння аднаго з відаў.
Дакладна невядома, колькі такіх гібрыдаў «пізлі» існуе ў прыродзе, але магчымасцей для спарвання абодвух відаў становіцца ўсё больш.
Цяпер чытаюць
Ціханоўскі: Ціханоўскай можна было ў 2020‑м не пабаяцца турмы. І, можа, у беларусаў быў бы шанец76
Каментары