Беларускі міні-футбольны клуб паклікаў на юбілей нібыта расіян, а насамрэч — дрэнна замаскаваных «дээнэраўцаў»
22 жніўня аршанскі клуб «Вітэн», які выйграў два з трох апошніх чэмпіянатаў Беларусі па міні-футболе, апублікаваў афішу турніру ў гонар 25-годдзя клуба. Сярод удзельнікаў ёсць і адзін замежны госць, пазначаны на афішы як «Спартак (Данецк, Растоўская вобл., Расія)». Але на сайце Tribuna.com правялі невялікае расследаванне і прыйшлі да высновы, што гэта ўсё толькі кепскі камуфляж.
У расійскай Растоўскай вобласці сапраўды ёсць горад Данецк, але ніякіх міні-футбольных камандаў там няма. Затое ў Растоўскай вобласці ёсць проста футбольны клуб «Спартак-Данецк». Праўда, ён 9 сакавіка зняўся з розыгрышу расійскага Д2 «у сувязі са складанай фінансавай сітуацыяй, якая ўзнікла ў клуба».
На афіцыйных рэсурсах клуба і Асацыяцыі міні-футбола Расіі (АМФР) ніякіх звестак пра адраджэнне гэтай каманды няма. Затое тыдзень таму ў адным з растоўскіх СМІ з'явілася інфармацыя, што той самы «Спартак-Данецк», які гуляў у Д2, раптам правёў таварыскі матч з былымі калегамі па дывізіёне з «Растова».
У сацсетках «Растова» каманда-супернік была пазначана проста як «Спартак-Данецк», без ніякіх тлумачэнняў. Але адначасова пра гэты матч як пра свой паведаміла і каманда з выразным засведчваннем у профілі: «Афіцыйная старонка міні-футбольнага клуба «Спартак» (Данецк, ДНР)».
Такім чынам, менавіта «дээнэраўскі» «Спартак» з акупаванага ўкраінскага Данецка выразна дэкларуе ў сацсетках, што будзе ўдзельнічаць у турніры ў Оршы — і ўжо нават выехаў у Беларусь.
Пры гэтым на афішы да спаборніцтва гэты «Спартак» назваў сябе гэтак жа, як колішні расійскі — «Спартак-Данецк». А яшчэ раней сацсеткі гэтага «Спартака» называлі «нашай камандай» «Спартак-Данецк U-21», які гуляў у расейскім Д3 і фармальна не быў звязаны са «Спартаком-Данецкам» з Растоўскай вобласці.
Пры гэтым ва ўсіх каманд адна і тая ж эмблема — з выкарыстаннем акантоўкі ў выглядзе георгіеўскай стужкі.
У выніку ўсё выглядае так, што ў Беларусі будуць гуляць прадстаўнікі «ДНР». А іх галоўны трэнер Мікалай Крыкун — бацька ўраджэнца Горлаўкі Данецкай вобласці, чэмпіёна Беларусі з «Вітэнам» і пасля змены грамадзянства гульца зборнай Беларусі Сяргея Крыкуна.
Зрэшты, і без таго, як адзначае аўтар тэксту, усё адразу намякала, што рэгістрацыя клуба «Спартак-Данецк» на тэрыторыі Расеі — проста фікцыя, неабходная для таго, каб Расію за ўдзел клуба з непрызнанай цывілізаваным светам тэрыторыяй у прафесійнай лізе не пакарала УЕФА. Прэзідэнтам нібыта расійскага клуба значылася Алена Сыраватка — мяркуючы па сацсетках, жонка прэзідэнта «дээнэраўскага» «Спартака» Юрыя Сыраваткі, які таксама займае пасаду «міністра юстыцыі» «ДНР».
Цяпер чытаюць
Хто такі Міхаіл Мяховіч — сілавік, які вядзе канал ГУБАЗіКа і адказвае за прабіў людзей19
Каментары