Што вядома пра арышт і зняволенне сенатара Ігара Сяргеева, дырэктара Беларускага цэментнага завода
Прапаў амаль год таму — а ніхто і не заўважыў яго знікнення.
У гэтым годзе быў вынесены прысуд генеральнаму дырэктару Беларускага цэментнага завода. Пра гэта паведаміў старшы пракурор Генеральнай пракуратуры Беларусі Андрэй Федаровічаў.
«Сёлета за карупцыйныя злачынствы да крымінальнай адказнасці прыцягнулі 607 чалавек, чацвёра з якіх займалі адказныя пасады. За хабарніцтва былі асуджаныя генеральныя дырэктары «Камунаркі», Беларускага цэментнага завода, Гродзенскага мясакамбіната і іншыя высокапастаўленыя службовыя асобы», — заявіў ён.
Пра пераслед кіраўніка цэментнага завода раней не было вядома. Пра каго ідзе гаворка? З 2021 года на чале прадпрыемства быў Ігар Сяргееў. Ён жа ў 2024 годзе быў абраны членам Савета Рэспублікі ад Магілёўскай вобласці.
Калі дакладна знік Сяргееў, незразумела. Гэта адбылося ў канцы 2025 года ці ў самым пачатку 2026 года.
На сайце «Голаса Касцюкоўшчыны» апошняе меркаванне ад яго імені было апублікавана 17 лістапада 2025 года, хоць звычайна Сяргеева там згадвалі штомесяц.
Новы дырэктар з’явіўся на Беларускім цэментным заводзе ў маі 2026 года. Пасаду заняў Яўген Валошчык, які раней быў галоўным тэхнолагам у «Краснасельскбудматэрыялах» — іншым цэментным прадпрыемстве, яно знаходзіцца ў Ваўкавыскім раёне. Агулам жа Валошчык адпрацаваў на тым заводзе больш за 20 гадоў.
Ігару Сяргееву 47 гадоў. Ён усю кар’еру зрабіў у Крычаве, дзе і нарадзіўся. Скончыў Беларускую сельскагаспадарчую акадэмію, трохі папрацаваў у калгасе на радзіме і ў хлебапрыёмным прадпрыемстве, а пасля на доўгі час — з 2003 да 2021 — засеў у «Крычаўцэментшыферы». Там Сяргееў прайшоў шлях ад інспектара службы кантролю да намесніка дырэктара па камерцыйных пытаннях. І адтуль яго перавялі ў Касцюковічы на Беларускі цэментны завод — дырэктарам.
Агулам у Беларусі ёсць тры цэментныя заводы, аб’яднаныя ў холдынг — у Касцюковічах, у Крычаве і ў Краснасельскім. У кожны з іх дзяржава ўклала сотні мільёнаў даляраў, але яны па-ранейшаму працуюць у мінус, а топ-менеджараў перыядычна саджаюць за карупцыю.
Сяргееў не стаў выключэннем. За атрыманне хабару асобай, якая займае адказнае становішча (ч. 3. арт. 430 Крымінальнага кодэкса), прадугледжваецца ад 5 да 15 гадоў калоніі. Выглядае, што першасны суд ужо адбыўся. Але невядома, былы сенатар чакае апеляцыю ці ўжо адправіўся ў калонію.
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары