Абласныя і раённыя чыноўнікі, «моцныя гаспадарнікі», сілавік. У Гомелі ідзе цэлы канвеер судоў па карупцыі
У пачатку сакавіка ў судах Гомельскай вобласці разглядаецца адразу некалькі крымінальных спраў у дачыненні да кіраўнікоў дзяржаўных органаў. Выданне «Флагшток» расказала, каго гэтымі днямі судзяць у Гомелі па карупцыйных злачынствах. Імёны для рэгіёна гучныя.
Кіраўніцтва «Мілкавіты»
Нягледзячы на багацце карупцыйных спраў з удзелам вышэйшых службовых асоб вобласці, дзяржСМІ абыходзяць гэтую тэму бокам. Адзінае выключэнне — рэзанансная крымінальная справа аб закупцы непрыдатнай для ўжывання кармавой дабаўкі «Зеол 3», выкарыстанне якой прыводзіла да падзяжу жывёлы.
Са звестак следства вядома, што двое прадпрымальнікаў з Мінска, не маючы спецыяльнай адукацыі, прыдумалі рэцэптуру кармавой дабаўкі і замовілі яе вытворчасць у Расіі.
Па версіі следчых, для падману спажыўцоў фігуранты схілілі супрацоўніка Інстытута эксперыментальнай ветэрынарыі імя С. М. Вышалескага Івана Дубіну да правядзення фармальных даследаванняў і складання недакладных справаздач аб эфектыўнасці кармавой дабаўкі.
Іншымі фігурантамі крымінальнай справы з'яўляюцца генеральны дырэктар і вядучы спецыяліст па сельскай гаспадарцы ААТ «Мілкавіта». Па версіі следства, былы кіраўнік прадпрыемства Віталь Нікулін за прыняцце рашэння аб закупцы «Зеол 3» атрымаў хабар у памеры 25 000 рублёў, а ягоны падначалены — 16 000 рублёў.
Судовае разбіральніцтва па справе праходзіць у судзе Чыгуначнага раёна Гомеля. Абвінавачваным ставяць у віну махлярства, службовыя падробкі, атрыманне хабару і перавышэнне ўлады і службовых паўнамоцтваў.
Першы намеснік старшыні Веткаўскага райвыканкама
У асобную вытворчасць па справе непрыдатнай для ўжывання кармавой дабаўкі «Зеол 3» выдзелены эпізод з удзелам першага намесніка старшыні Веткаўскага райвыканкама Сяргея Заблоцкага. Па версіі следства, для лабіравання продажу «Зеол 3» сярод гаспадарак Веткаўскага раёна намеснік старшыні райвыканкама атрымаў у якасці хабару не менш за 5000 рублёў.
Цяпер экс-чыноўніка судзяць за перавышэнне ўлады і службовых паўнамоцтваў, а таксама за атрыманне хабару. Справа разглядаецца ў судзе Чыгуначнага раёна Гомеля.
Кіраўніцтва Гомельскага завода ветэрынарных прэпаратаў
Пастаўка гаспадаркам непрыдатнай да ўжывання кармавой дабаўкі — не адзіны карупцыйны скандал у ветэрынарнай сферы Гомельскай вобласці.
Перад судом Навабеліцкага раёна Гомеля раней таксама сталі дырэктар, галоўны бухгалтар і начальнік камерцыйнага аддзела УП «Гомельскі завод ветэрынарных прэпаратаў». Іх абвінавацілі ў крадзяжы, злоўжыванні ўладай і службовымі паўнамоцтвамі ды ў службовых падробках.
Цяпер у Гомельскім абласным судзе ідзе разгляд апеляцыі.
Галоўны чыгуначнік вобласці
У судзе Савецкага раёна Гомеля праходзіць разгляд крымінальнай справы па факце карупцыі на Беларускай чыгунцы. Адзін з абвінавачваных — былы начальнік Гомельскага аддзялення БЧ Рыгор Дворак.
Усяго па справе праходзіць сем фігурантаў, якіх абвінавачваюць у хабарніцтве, крадзяжы, злоўжыванні ўладай, а таксама ў службовых падробках.
Міліцэйскі начальнік
Гомельскія сілавікі не толькі ловяць чыноўнікаў на хабарах, але і самі імі не грэбуюць. У судзе Цэнтральнага раёна Гомеля праходзіць разгляд крымінальнай справы ў дачыненні да Андрэя Кузьмянкова. Абвінавачваны ўзначальваў упраўленне фінансаў і тылу УУС Гомельскага аблвыканкама.
Цяпер яго судзяць паводле артыкула 430 ч. 3 КК Беларусі. Гэты артыкул прадугледжвае, што для здзяйснення злачынства службовыя асобы аб'ядналіся ў кіраваную ўстойлівую групу.
Галоўны будаўнік вобласці
З пункту гледжання пасады фігурантаў самым рэзанансным варта прызнаць судовы працэс над экс-старшынёй камітэта архітэктуры і будаўніцтва Гомельскага аблвыканкама Сяргеем Атрашковым.
Сяргей Атрашкоў узначаліў будаўнічую галіну Гомельскай вобласці ў красавіку 2022-га, але не пратрымаўся і года.
Сёння ён адзін з фігурантаў крымінальнай справы па службовых падробках, крадзяжы і перавышэнні ўлады. Акрамя чыноўніка з аблвыканкама, абвінавачваным выступае таксама дырэктар СУ-243 ААТ «ДСК» Віктар Кончыц. Справа разглядаецца ў судзе Савецкага раёна Гомеля.
На нядаўнім пасяджэнні Гомельскага гарадскога выканаўчага камітэта пракурор абласнога цэнтра Юрый Булынка заявіў, што ў параўнанні з 2021 годам у Гомелі ўзрасла колькасць карупцыйных спраў на 30 працэнтаў. Пра гэта паведамляе «Гомельская праўда».
Значная колькасць зарэгістраваных крадзяжоў шляхам злоўжывання службовымі паўнамоцтвамі здзейснілі самі кіраўнікі арганізацый, на якіх ускладзены абавязак па арганізацыі антыкарупцыйнай працы, акцэнтаваў увагу пракурор. Імёны фігурантаў карупцыйных спраў Булынка не назваў.
Каментары