«Месца ў трохпакаёўцы, дзе пражывае 4-6 студэнтаў, здаю па 70 даляраў». Як рост даляра ўплывае на арэнду
Стаўкі на арэнду жытла традыцыйна прывязаны да даляра, адносна якога беларускі рубель апошні месяц вельмі не стабільны. Спыталі ў арэндадаўцаў і арандатараў, як рынак рэагуе на курсавыя ваганні.
Мінск
Чытачы з Мінска ўжо год здаюць аднапакаёўку-студыю на 38 «квадратаў» за 670 рублёў.
«Цану як адразу замацавалі ў рублях, так і не менялі, каб не шукаць іншых жыльцоў», — кажа чытачка.
Іншыя суразмоўцы з Мінска здаюць еўрадвушку ў Новай Баравой за 370 даляраў у месяц.
«Кватэра здаецца ўжо больш за год, арандатары — сябры знаёмых. Цана ад пачатку была не высокая, калі здавалі, курс даляра быў на піку, прыкладна, як і цяпер. Арандатары за ўвесь час пытанне цаны не падымалі, заўжды спраўна плацілі дамоўленыя $370. Мы са свайго боку адвязвацца ад стаўкі ў валюце не збіраемся, бо жывем за мяжой і рублі нас не вельмі цікавяць», — прызнаецца чытачка.
Таксама суразмоўца адзначае, што падымаць стаўкі па арэндзе не збіраецца, хоць і разумее, што пры жаданні можна здаваць гэтую кватэру крыху даражэй.
«Але гэта дадатковыя клопаты, плюс трэба разумець, што цяпер няма высокага попыту на кватэры, таму нават месяц прастою прынясе нам мінус 400 даляраў, бо трэба яшчэ і за камунальныя паслугі заплаціць. У выніку мы палічылі, што лепей стабільна здаваць па 370, чым шукаць некага, хто будзе плаціць 400 ці 450.
Тым больш, што нашыя арандатары нам падабаюцца і наколькі мы ведаем, з'язджаць бліжэйшым часам яны не плануюць», — кажа жанчына.
Гродна
Чытачка з Гродна, якая ўжо некалькі гадоў здае ложак-месцы студэнтам, адзначае, што цягам некалькіх гадоў стаўкі пакідае без зменаў.
«Месца ў трохпакаёўцы, дзе пражывае 4-6 студэнтаў, каштуе 70 даляраў у месяц. У агучаны кошт уключаны камунальныя паслугі», — кажа чытачка.
Жанчына кажа, што стаўкі зафіксаваныя ў далярах і змяняць гэта яна не збіраецца. Хоць пры кожным прасяданні рубля і чуе такія прапановы.
«Узнікае пытанне, па якім курсе будзем фіксаваць цану і што будзем рабіць, калі курс зноў стане меншым, як гэта неаднаразова было? Вынікае, што арандатары хочуць зафіксаваць, напрыклад па 3 рублі за даляр, але калі стане 2,8, то папросяць зніжку. Выглядае не надта», — дзеліцца жанчына.
Таму трымае цану, зафіксаваную ў далярах ЗША.
Тым не менш, чытачка адзначае, што попыт на жытло ад студэнтаў патрохі скарачаецца.
«Інтэрнатаў стала больш, а студэнтаў крыху менш. Але тым не менш, попыт ёсць і кватэры заселяцца і на такіх умовах».
Іншы чытач з Гродна, які здымае аднапакаёўку за 150 даляраў у месяц, кажа, што, нягледзячы на прасяданне рубля, гаспадары кватэры нядаўна заявілі, што хочуць падняць стаўку на 20 даляраў.
«Мяне гэта вельмі здзівіла, бо даляр і без таго моцна падаражэў і ў нашых грошах арэнда стала даражэйшай. Давялося тлумачыць гаспадару, што гэта нелагічны крок. Тым больш, што я, як і большасць беларусаў, зарплату маю ў рублях», — распавядае чытач.
Магілёў
Чытач з Магілёва здае двухпакаёўку на ўскрайку горада за 450 рублёў у месяц. Цана зафіксаваная ў рублях. Плошча кватэры пад 50 «квадратаў».
Мужчына пачаў здаваць кватэру яшчэ ў 2012 годзе, таму памятае, як пры канцы 2014 года моцна знізіліся стаўкі на арэнду.
Апошнія арандатары жывуць у ягонай кватэру ўжо не першы год
«Я не прывязваюся да курсу даляра. Людзі зарабляюць у асноўным у рублях, таму гэтыя ваганні ім і мне толькі лішні клопат і нервы. Дамаўляемся па цане ў рублях, потым раз у паўгода-год пры вялікай інфляцыі павялічваем стаўку», — кажа чытач.
Па ягоных словах, год таму яму плацілі 400 рублёў за арэнду, а два гады таму — 380. То-бок фактычна стаўка не паспявае ні за ростам курсу, ні за інфляцыяй. Тым не менш, фіксаваць цану ў далярах мужчына не збіраецца.
«Мне нявыгадна калі людзі з'язджаюць, я губляю час, пакуль шукаю новых. Да таго ж трэба прыбрацца, некалькі разоў з'ездзіць, каб паказаць кватэру. Гэта лішнія выдаткі», — тлумачыць мужчына.
Таксама мужчына адзначае, што, па ягоных назіраннях, за апошнія два гады, попыт на доўгатэрміновую арэнду кватэр у Магілёве знізіўся.
Ці не стане Новая Баравая спальнікам і ці плануе яе забудоўшчык ісці ў рэгіёны?
Гродзенцы ад світанку выстройваюцца ў чэргі, каб набыць новыя кватэры ад дзяржзабудоўшчыка. У чым прычына?
У Брэсце здаецца кватэра за 1000 даляраў на месяц. Сапраўды настолькі шыкоўны варыянт?
Каментары