Жыхары цэнтра і захаду Беларусі наракаюць на смугу і пах гару. У Вільні распаўсюдзілі трывожнае апавяшчэнне. Што адбываецца?
МНС Беларусі захоўвае маўчанне, але апавяшчэнне Літвы і фоты НАСА даюць ключ да разумення сітуацыі.
Учора жыхары Ліды, Наваградка, Слоніма, Вільні назіралі смугу, якая засланяла сонца, і адчувалі лёгкі пах гару.
У Беларусі ўлады захоўвалі маўчанне, жыхарам усходу Літвы Міністэрства аховы здароўя разаслала «трывожную эсэмэску» — так у Літве апавяшчаюць пра надзвычайныя сітуацыі.
Сёння дым перамясціўся ў кірунку Мінска. Першымі яго адчулі жыхары заходніх раёнаў сталіцы.
Інфармацыю аб якасці паветра ў рэальным часе публікуе сайт World's Air Pollution. Сайт атрымлівае інфармацыю з датчыкаў і адразу паказвае індэкс забруджвання.
Паводле даных World's Air Pollution, у Мінску сапраўды ёсць праблема з паветрам. Датчык на вуліцы Бельскага, Каліноўскага і Кальцова паказвае ўзровень забруджвання, які абазначаны як «нездаровы».
Што адбываецца?
Санітарныя службы Літвы звязалі смог з «пажарамі ў лясах і на тарфяніках» Беларусі. І папрасілі тых з людзей, якія кепска пераносяць смог, менш быць на дварэ, трымаць вокны закрытымі і часцей рабіць прыборку.
Аднак мы не маем інфармацыі пра лясныя пажары ці пажары тарфянікаў на тэрыторыі Беларусі. У той жа час спадарожнікавыя здымкі НАСА, магчыма, даюць ключ да таго, што адбываецца.
На іх відаць хвост дыму ад вялікага пажару ў Чарнобыльскай зоне на тэрыторыі Украіны. А таксама аналагічны хвост ад ланцуга пажараў у зоне баявых дзеянняў у Бранскай вобласці Расіі і Чарнігаўскай вобласці Украіны — там узгаранні вялікія, лясы сёлета стаяць выключна сухія. Нагадаем, што і ў Магілёўскай і Гомельскай абласцях Беларусі абвешчана пра самы высокі ўзровень пажарнай небяспекі.
Мы пісалі пра кліматычную анамалію: у Беларусь і Літву перамясцілася паветра з Цэнтральнай Азіі. Вецер у гэтыя дні — паўднёва-усходні.
Магчыма, напрамак ветру і іншыя метэаралагічныя ўмовы такія, што дым ад пажараў у Чарнобыльскай зоне і ў зоне баявых дзеянняў заслаў захад Беларусі, а сёння дайшоў да Мінска.
Будзем чакаць інфармацыі ад МНС Беларусі. Пакуль яе не было.
Дзяржаўныя органы Літвы не паведамляюць пра змену радыяцыйнай сітуацыі.
Цяпер чытаюць
Як асабістая доктарка Лукашэнкі вучыць беларусаў цаніць радзіму, а сама скупляе люкс і адпачывае на Блакітным Беразе ШМАТ ФОТА42
Як асабістая доктарка Лукашэнкі вучыць беларусаў цаніць радзіму, а сама скупляе люкс і адпачывае на Блакітным Беразе ШМАТ ФОТА
На Афоне адшукалі тры невядомыя раней асобнікі Астрожскай Бібліі. Для яе стварэння друкар Іван Фёдараў, выхадзец з Беларусі, выкарыстоўваў тэксты Скарыны44
Каментары
Падвязвайце з раскошай, пакуль плянэтка гіне