Новы незвычайны спосаб рамантычных знаёмстваў набірае шалёныя абароты
Іспанію ахапіла сапраўдная любоўная ліхаманка — адзінокія людзі шукаюць партнёраў у супермаркетах з дапамогай спецыяльнага «фруктовага кода». А пачалося ўсё з роліка ў тыктоку.
Камедыйная актрыса Віві Лін зняла відэа, у якім распавяла, што ў сетцы супермаркетаў Mercadona ёсць пэўны «час для флірту». З 19:00 да 20:00 з вазком у руках можна знайсці сабе рамантычнага партнёра, піша Бі-бі-сі.
Дастаткова пакласці ў кошык з пакупкамі перакулены ананас — гэта сакрэтны сігнал для супрацьлеглага полу, што вы гатовыя для рамантычных адносін.
Ролік сабраў мільёны праглядаў, а трэнд падхапілі многія знакамітасці.
На фан-старонцы Лін ёсць фота ананаса з подпісам: «Ананас на паліцы Mercadona чакае, калі вы знойдзеце сабе пару».
Сама ж акторка з гумарам ставіцца да папулярнасці новага трэнду.
«Думаю, за ажыятажам, які выклікала маё відэа, хутчэй хаваецца імкненне да гумару, чым да кахання, — сцвярджае яна. — Людзям больш хочацца смяяцца, чым фліртаваць. Я ўпэўнена, што гэты трэнд на знаёмства замацуецца ў грамадстве. І мы, без сумневу, хутка ўбачым пары, якія пазнаёміліся ў Mercadona ў паказаны час. Хто шукае, той заўсёды знойдзе!»
Гісторыя атрымала розгалас і прывяла да незвычайных, а часам хаатычных сітуацый.
У Мадрыдзе да флэшмобу далучыліся падлеткі, якія ўвечары штурхалі пустыя вазкі ў крамах, не купляючы тавараў.
Аднаго мужчыну яго сябры апранулі ў касцюм гіганцкага ананаса ў краме падчас святкавання хлапечніка.
У Більбаа супрацоўнікам Mercadona нават даводзілася выклікаць паліцыю з 19:00 да 20:00 з-за шумных сцэн у краме.
Сетка Mercadona першапачаткова не звяртала ўвагі на любоўны ажыятаж. Але кажуць, што «ананасавая манія» не падабаецца многім работнікам, якім даводзіцца разграбаць нявыкупленыя тавары.
У некаторых аддзяленнях па ўсёй краіне нават пачалі прыбіраць з продажу ананасы, каб прыцішыць рамантычны запал кліентаў.
Кампанія сцвярджае, што »трэнд запусцілі без іх удзелу, усё атрымалася спантанна».
Да флэшмобу вырашылі далучыцца іншыя сеткі — Lidl і Carrefour. Пра гэта яны паведамілі ў сваіх акаўнтах у X (Twitter), але прапанавалі іншы апазнавальны знак — кавун.
Гэта не першы выпадак, калі перавернуты ананас выкарыстоўваецца ў якасці любоўнага кода.
Вядома, што гэты фрукт таксама з'яўляецца сімвалам свінгераў — людзей, зацікаўленых у абмене сэксуальнымі партнёрамі.
Цяпер чытаюць
Лукашэнка: У амерыканцаў няма ніякага плана, яны проста зандуюць глебу13
Каментары