Пасля ўвядзення новых санкцый ЗША пастаўкі расійскай нафты ў Турцыю абваліліся ў 4 разы
Турцыя амаль у 4 разы скараціла імпарт нафты з Расіі пасля ўзмацнення строгасці амерыканскіх санкцый, пад якія трапілі «Газпрам нафта», «Сургутнафтагаз» і больш за 180 танкераў «ценявога флоту», піша The Moscow News.
У лютым адгрузкі нафты расійскай маркі Urals з балтыйскіх партоў Прыморска і Усць-Лугі і чарнаморскага Наварасійска ў кірунку Турцыі абваліліся да 0,42 млн тон з 1,56 млн тон месяцам раней, паведамляе Reuters са спасылкай на статыстыку танкерных перавозак і знаёмыя з сітуацыяй крыніцы.
Выніковыя аб'ёмы экспарту ўпалі да самага нізкага ўзроўню са снежня 2022 года пасля таго, як ад расійскай нафты адмовіўся найбуйнейшы турэцкі нафтаперапрацоўшчык — стамбульская Turkiye Petrol Rafinerileri (Tupras). Кампанія перастала прымаць грузы Urals, патрабуючы, каб яны адпавядалі санкцыйным абмежаванням — у прыватнасці, цэнавай столі, якая вызначаная на ўзроўні $60 за барэль.
Замену расійскай нафты турэцкія НПЗ шукаюць у Афрыцы, нарошчваючы закупкі з рэгіёну да 5-гадовых максімумаў. Так, паводле даных Reuters, у лютым у парты Турцыі прыбыло 0,36 мільёнаў тон лівійскіх марак Es Sider і Amna — у чатыры разы больш, чым у студзені (80 тысяч тон). А імпарт нігерыйскай нафты Forcados Blend дасягнуў 0,26 млн тон і стаў самым высокім з 2020 года.
Паводле ацэнак Альфа-банка, праз новыя санкцыі Расія можа страціць да 800 тысяч барэляў штодзённага нафтавага экспарту, або прыкладна траціну ўсіх аб'ёмаў, што вывозяцца танкерамі з марскіх партоў.
Кітай замяніў палову расійскай нафты пастаўкамі з Бразіліі і Анголы
Расія не можа з-за санкцый прадаць мільёны барэляў нафты і рыхтуецца скарачаць здабычу
Данія вырашыла правяраць танкеры расійскага ценявога флоту. Гэта рэзкая змена ранейшых падыходаў
Кітай і Індыя спынілі закупкі расійскай нафты на фоне санкцый
З-за санкцый ЗША дрэйфуюць у моры як мінімум 65 танкераў з расійскай нафтай
Каментары