Блогер паказаў, як пераварыў самы гнілы «Фальксваген Гольф» у Беларусі
Аб'ёмы выкананых работ уражваюць, бо майстар фактычна зварыў машыну нанова.
Першыя відэа з «Фальксваген Гольф», які амаль цалкам выгніў, аўтар апублікаваў у верасні 2024 года. Рамонтныя працы працягнуліся паўгода.
На відэа бачна, што ў машыны не засталося ніводнага элемента, які б не быў моцна пашкоджаны карозіяй.
Парогі раней «рамантавалі» з дапамогай мантажнай пены. У выніку яны настолькі моцна прагнілі, што пасля выдалення пашкоджаных элементаў, парогаў і большай часткі днішча ў машыне не засталося. Уся канструкцыя трымалася толькі на даху і цэнтральным тунэлі.
У відэа хлопец распавядаў, што сярод іншага яму давялося канструяваць мацаванне для крэсла кіроўцы, паколькі яно таксама прагніла.
Задняя левая чвэрць выгніла настолькі моцна, што майстар вырашыў замяніць яе на выразаную з іншай машыны.
У каментарах пад відэа людзі не толькі выказваюць захапленне ад таго, што ў блогера рукі растуць з правільнага месца, але і задаюцца пытаннем мэтазгоднасці такога рамонту.
Відавочна, што з эканамічнага пункту гледжання такі рамонт не мае ніякага сэнсу, бо прагніў гэты Гольф літаральна паўсюль.
Сам блогер тлумачыць, што гэта машына знаёмага, які папрасіў яго падварыць аўто. А паколькі ўсю глыбіню трагедыі можна было ўбачыць толькі разабраўшы машыну, майстар нібыта не мог адмовіцца ад рамонту, хоць і папярэджваў гаспадара аб тым, што рабіць гэтую машыну сэнсу няма.
Тым не менш прынамсі для стварэння кантэнту такі «Гольф» — гэта акурат тое, што трэба.
Цяпер чытаюць
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню27
Каментары