Душ уражанняў «Карыбскі шторм», верталётная пляцоўка, спальня памерам з двухпакаёвую кватэру… Пра тое, як выглядае рэзідэнцыя Лукашэнкі «Краснасельскае» за 40 кіламетраў ад Мінска, расказаў «Белпол».
Тэрыторыя, на якой размешчана сядзіба, складаецца з некалькіх зямельных участкаў, якія былі аб’яднаныя ў адзін на працягу некалькіх гадоў. Арандатарам 11,6 гектара выступае Галоўнае ўпраўленне па абслугоўванні дыпламатычнага корпуса і афіцыйных дэлегацый Упраўлення справамі Лукашэнкі «Дыпсэрвіс».
«Дыпсервіс» атрымаў зямлю ў арэнду па асабістым распараджэнні Лукашэнкі і пачаў здаваць яе ў арэнду кампаніі «СертусАвіа», якая належыць афшорнай прыватнай кампаніі, зарэгістраванай на Кіпры. Абедзве кампаніі звязваюць з расійскім алігархам Міхаілам Гуцэрыевым.
Раней алігарх сцвярджаў, што «Краснасельскае» належыць яму. Так, у інтэрв’ю Tut.by ён казаў, што Лукашэнка сам прапанаваў яму стары будынак базы адпачынку, якая знаходзілася на балансе Упраўлення справамі. У выніку ён яе набыў.
Аднак, як сведчаць дакументы, якія атрымаў «Белпол», будаўніцтва на тэрыторыі рэзідэнцыі ажыццяўлялася пад пастаянным наглядам Упраўлення справамі Лукашэнкі.
Цяпер па перыметры рэзідэнцыі размешчана каля 60 камер відэаназірання. На тэрыторыі знаходзяцца тры буйныя памяшканні.
Агульная плошча дома №1 складае 730 квадратных метраў. На першым паверсе знаходзяцца сталовая, бібліятэка, хатні кінатэатр, пакой адпачынку, некалькі гасцявых пакояў і зімовы сад.
На другім паверсе размешчаны некалькі ванных пакояў, гардэробная, спальні і асабісты кабінет памерам 78 квадратных метраў з асобным пакоем для сейфа. Пакой памерам 56,5 квадратнага метра адведзены пад спальню Лукашэнкі.
У цокалі будынка размешчаны адзіны на ўвесь комплекс пакой аховы. Акрамя яго — традыцыйная турэцкая лазня, сауна, джакузі, трэнажорная зала і басейн памерам 84,6 квадратнага метра. Побач знаходзіцца ўваход у вінны склеп.
Па словах «Белпола», толькі кошт карнізаў і штораў у доме №1 складае 560 тысяч беларускіх рублёў (па першым варыянце) або 449 тысяч (па другім варыянце). А агульны кошт штораў, фальштораў і маркізаў, як сцвярджаюць белполаўцы, складае ад 236 да 287 тысяч даляраў.
Агульная плошча дома №2, які пазначаны як гасцявы, складае 453 квадратныя метры. На першым паверсе размешчаны некалькі санвузлоў, сталовая, гасцёўня, асабісты кабінет. На другім паверсе размешчана некалькі спальняў і гардэробных, санвузлы, ёсць тэраса і зімовы сад.
На цокальным паверсе знаходзяцца прасторны басейн, сауна і турэцкая лазня. Ёсць таксама більярд і трэнажорны пакой.
Дом №3 — самы вялікі на тэрыторыі рэзідэнцыі. У ім знаходзіцца рэстаран, сумешчаны з домам прыслугі. Там ёсць пакой шэф-кухара, пакой для афіцыянтаў, гарачы цэх, памяшканне для мыцця сталовага посуду і асобнае — для кухоннага, а таксама некалькі спальняў у асобным крыле дома.
«І ўсё гэта спраектавана такім чынам, што ўвесь абслуговы персанал можа выконваць свае абавязкі, не трапляючы ў поле зроку Лукашэнкі ці яго світы», — заўважаюць расследавальнікі.
У доме таксама размешчаны зала прыёмаў і більярдны пакой.
Згодна з дакументамі, на абсталяванне бара толькі тэхнікай для прыгатавання кавы было выдаткавана амаль 5 тысяч даляраў.
Да дома №1 падведзена лінія спецсувязі, што сведчыць аб тым, што рэзідэнцыя прызначана менавіта для Лукашэнкі, а не для Гуцэрыева.
Пра тое, што комплекс будаваўся менавіта для Лукашэнкі, ускосна сведчыць і наяўнасць на тэрыторыі верталётнай пляцоўкі, кошт якой склаў 100 тысяч даляраў.
Акрамя жылых дамоў, на тэрыторыі ёсць СПА-цэнтр з басейнам (агульная плошча 940 квадратных метраў) і душам уражанняў «Карыбскі шторм», дом паляўнічага і рыбака (плошчай 230 квадратных метраў) і гаражы.
«Стаяць на сваім, кожны наколькі можа!». Вялікая гутарка з Наталляй Дулінай пра гопнікаў з ГУБАЗіКа, Калеснікаву і што там у каго ў калоніі5
Каментары
,кал-хозник? Ничего утащить на тот свет не удастся. Да и отродью своему завещать,ну такое—Асада спроси. А ведь всего-то :надо было жить по-человечески,не убивать Захаренко и Гончара .
Никакую страницу «перавернуть» не получится—уж слишком много ты тут фокусов натворил. Ну если мозги кал-хозные,что уж тут.