Былую беларускую журналістку з прытулкам у Чэхіі абвінавацілі ў працы на расійскую разведку
Былая беларуская журналістка Наталля Судлянкова і супрацоўнік расійскай спецслужбы ГРУ Аляксей Шаўроў дададзеныя ў чэшскі нацыянальны санкцыйны спіс. Пра гэта 2 красавіка, паведаміла Служба інфармацыйнай бяспекі Чэхіі (BIS), піша «Радыё Свабода». Раней Судлянкова атрымала ў Чэхіі прытулак, але цяпер яна павінна пакінуць краіну на працягу 30 дзён.
Па словах міністра замежных спраў Чэхіі Яна Ліпаўскага, Наталля Судлянкова з'яўляецца ключавым супрацоўнікам расійскай вайсковай выведкі ГРУ і на працягу многіх гадоў таемна і свядома працавала на некалькі расійскіх арганізацый у Чэшскай Рэспубліцы, піша выданне Seznam Zpravy.
Пра тое, што чэшскі ўрад дадаў беларускую журналістку Наталлю Судлянкову і супрацоўніка расійскай сакрэтнай службы ГРУ Аляксея Шаўрова ў нацыянальны санкцыйны спіс, паведаміў журналістам прэм’ер-міністр Пётр Фіяла пасля пасяджэння Кабінета міністраў.
Фіяла заявіў, што, паводле высноў Службы інфармацыйнай бяспекі (BIS), Судлянкова выконвала аперацыі ГРУ ў Чэшскай Рэспубліцы, якія ішлі непасрэдна з Масквы, а кіраваў ёй Шаўроў.
«Абедзве гэтыя асобы ўяўляюць рызыку і нават пагрозу бяспецы нашай краіны», — прыводзіць словы Фіялы Seznam Zpravy.
Паводле звестак чэшскай спецслужбы, акрамя ГРУ, Судлянкова супрацоўнічала з расійскай карпарацыяй «Расатам», Фондам падтрымкі і абароны правоў суайчыннікаў, мела дачыненне да грамадскай арганізацыі «Несмяротны полк».
«Яе дзейнасць фінансавалася непасрэдна з Расіі. За апошнія гады ёй заплацілі дзясяткі тысяч еўра ў крыптавалюце», — цытуе Ліпаўскага выданне Seznam Zpravy.
Акрамя гэтага, як паведамляецца, па даручэнні ГРУ Судлянкова арганізавала публікацыю некалькіх артыкулаў у чэшскіх СМІ, а таксама праводзіла дзейнасць на карысць расійскага алігарха Алішэра Усманава, які знаходзіцца пад санкцыямі, што таксама стала прычынай уключэння яе ў спіс.
У снежні 1999 года Наталля Судлянкова атрымала прытулак у Чэшскай Рэспубліцы, але, паводле слоў міністра ўнутраных спраў Віта Ракушана (STAN), цяпер ёй давядзецца пакінуць краіну на працягу 30 дзён. Шаўроў, паводле інфармацыі выдання Respekt, цяпер знаходзіцца ў Расійскай Федэрацыі.
Уключэнне ў чэшскі нацыянальны санкцыйны спіс азначае, што адпаведным асобам забараняецца ўезд і знаходжанне ў Чэшскай Рэспубліцы, забараняюцца любыя фінансавыя аперацыі праз чэшскія арганізацыі або замарожваюцца любыя актывы ў краіне.
У Чэхіі Судлянкова працавала галоўным рэдактарам «Праскага тэлеграфа» — рускамоўнага штотыднёвіка, які выдаваўся ў Празе. У мінулым яна таксама супрацоўнічала з Радыё Свабодная Еўропа/Радыё Свабода і з часопісамі Týden і Lidové noviny.
Палітычны прытулак Наталля Судлянкова атрымала праз пераслед у Беларусі. Там яна нібыта балатавалася ў парламент ад Аб’яднанай грамадзянскай партыі, а таксама абвінавачвалася ў фінансавых злачынствах. У адным з інтэрв’ю чэшскаму тэлебачанню ў 2011 годзе Судлянкова казала: «У мяне былі некаторыя праблемы са спадаром Лукашэнкам і людзьмі з ягонай каманды. Мы не маглі заставацца на адной радзіме», — узгадвае яе словы выданне Respekt.
У 2001 годзе яе затрымалі на чэшска-нямецкай мяжы на падставе міжнароднага крымінальнага ордэра, выдадзенага ўрадам Беларусі. Але чэшскі суд адхіліў запыт Мінска, палічыўшы абвінавачванні Судлянковай неабгрунтаванымі.
Фёдар Віктаравіч і «Віктар Фёдаравіч». Супрацоўнік «Варгеймінга» мае пашпарт прыкрыцця. Яго жонка Вольга Сямашка — вядомая журналістка
Арыштавалі ў Польшчы і дэпартавалі ў Кіеў украінскага палітолага, пастаяннага ўдзельніка расійскіх прапагандысцкіх шоу
У нямецкім бундэстагу працаваў рэлакант з Расіі з сувязямі ў ФСБ
Каментары