Кампанія, якая катала Тыля Швайгера па Мінску, знайшла грошы. Але каманду ўжо расхапалі
Кампанія Blockchain Sports Ecosystem, якая некалькі месяцаў не выплачвала заробкі супрацоўнікам, нарэшце пагасіла частку запазычанасці, даведаўся Devby.io.
З 25 сакавіка ІТ-група Blockchain Sports Ecosystem пайшла на вымушаны прастой з-за фінансавых праблем. Кампанія паведаміла супрацоўнікам, што шукае інвестараў, каб закрыць усе даўгі, у тым ліку па арэндзе і заробках, і аднавіць працу.
Але праз некалькі дзён супрацоўнікі нечакана даведаліся аптымістычную навіну: кампанія дамовілася з буйным інвестарам пра доўгатэрміновае фінансаванне.
Кампанія не ўдакладніла падрабязнасці перамоў, у прыватнасці, не агучыла імя інвестара. Але паабяцала ўжо з 1 красавіка пачаць пагашэнне запазычанасцяў «перад супрацоўнікамі і контрагентамі ва ўсіх аддзелах і падраздзяленнях».
Па словах работнікаў Blockchain Sports Ecosystem, з якімі Devby.io ўдалося пагутарыць, сітуацыя з прыцягненнем інвестара поўная розных чутак. Паводле адной з версій, кіраўніцтва нібыта знайшло магчымасць пазычыць буйную суму грошай, якой хапіла на пагашэнне даўгоў і «нават на заробкі за пару месяцаў працы».
«Ходзяць такія чуткі, але хто пазычыў грошы і што будзе далей — невядома», — расказаў адзін з супрацоўнікаў. Паводле іншага супрацоўніка, «чуў, што пошукі інвестара працягваюцца, значыць, грошай няма».
Тым не менш з пачатку красавіка кампанія пачала пагашаць даўгі. У прыватнасці, як кажуць супрацоўнікі, яна закрыла запазычанасць перад падатковай і ФСАН, а таксама аплаціла арэнду офіса.
Што тычыцца запазычанасцяў па заробках, то кампанія цалкам разлічылася толькі з тымі супрацоўнікамі, якія прынялі рашэнне звольніцца.
«Калі заява на звальненне была падпісаная, напрыклад, 24 сакавіка, то супрацоўнік атрымаў поўны разлік да 24-га чысла, калі 28-га — то да 28-га. У маім выпадку сума набегла са студзеня да дня звальнення, гэта значыць фактычна за 3 месяцы. Плюс адпускныя і жудасны каэфіцыент 1,3% ад акладу за затрымку з улікам таго, што нейкі час мы ўсе былі ў прастоі і атрымлівалі 2/3 ад акладу», — падзяліўся падрабязнасцямі адзін з былых супрацоўнікаў кампаніі.
Колькі чалавек пайшло з кампаніі — невядома. Супрацоўнікі кажуць, што шмат. «Па маіх падліках, звольнілася ўжо чалавек з 300», — ацаніў адток адзін з работнікаў. Паводле іншага суразмоўцы, «у дзень, калі я падпісваў абыходны ліст, нават былі невялікія чэргі ў кабінеты».
У LinkedIn ёсць профілі больш за 50 супрацоўнікаў X-Labs Inc (уваходзіць у Blockchain Sports Ecosystem), якія зараз шукаюць працу.
«У нас працавала шмат крутых людзей, якіх з радасцю разабралі кампаніі, што былі ў курсе сітуацыі ў X Labs Inc. Аддзел распрацоўкі практычна пусты. Што б кампанія ні прыдумала цяпер — рабіць гэта проста няма каму», — падзяліўся думкай адзін з былых супрацоўнікаў.
Тыя, хто застаўся ў Blockchain Sports Ecosystem, пакуль знаходзяцца ў стане нявызначанасці. Пакуль ім пагасілі даўгі па заробку за студзень. Кампанія ўсё яшчэ ў прастоі, хоць офіс працуе.
На запыт devby у кампаніі не адказваюць.
IT-група Blockchain Sports Ecosystem аб’ядноўвае некалькі каманд/кампаній/юрасоб, у тым ліку рэзідэнта ПВТ X-Labs Inc. У Беларусі яна вядомая каля паўтара года.
Штат налічвае як мінімум некалькі соцень чалавек. Супрацоўнікі называлі лічбы ад 800 да 1000 чалавек, а з улікам расійскага офіса — нават больш; на старонцы Blockchain Sports у LinkedIn пазначаны дыяпазон ад 1 тысячы да 5 тысяч чалавек.
Мяркуючы па сайце, ІТ-група мае штаб-кватэру ў Дубаі і тры асноўныя дамены — мотаспорт, дрыфт, футбол. У лістападзе 2024 года яна прывозіла ў Беларусь акцёра Тыля Швайгера.
ІТ-холдынг, які прывозіў Тыля Швайгера і сышоў у прастой, абяцае заплаціць камандзе — знайшоўся «буйны інвестар»
ІТ-група на 1000 чалавек у Мінску, што прывозіла Тыля Швайгера, пайшла ў прастой і закрыла доступ у офіс
Тыль Швайгер апраўдаўся за візіт у Беларусь
У Беларусь прыехаў акцёр Тыль Швайгер
Як мучылі Ціля Швайгера і цэнтры гарадоў, каб стварыць карцінку для судзімага за махлярства пратэжэ Дзмітрыя Баскава
Каментары