Чаму вучэнні «Захад-2025» вырашылі правесці ў цэнтры краіны, а не каля межаў НАТА — меркаванне ўкраінскага палітолага
Расія проста тэхнічна не можа паўтарыць той фокус, які быў у лютым 2022 года, выказаў меркаванне Яўген Магда ў эфіры «Еўрарадыё».
Як вядома, Мінабароны Беларусі заявіла, што сумесныя беларуска-расійскія вучэнні «Захад-2025» будуць аднесеныя ад заходніх межаў.
Украінскі палітолаг Яўген Магда ў эфіры «Еўрарадыё» выказаў упэўненасць, што гэта можа быць сведчаннем таго, што «Расія не мае сіл для таго, каб распыляцца на правядзенне вучэнняў і ствараць для Украіны нейкую эфемерную пагрозу».
«Сёння зранку было паведамленне, што амерыканцы перакідваюць беспрэцэдэнтную колькасць самалётаў-запраўшчыкаў у Еўропу.
Перакінуць вялікую колькасць бронетэхнікі з Расіі ў Беларусь проста так немагчыма ва ўмовах спадарожнікавай разведкі.
Я думаю, што гэта [перанос вучэнняў] адпавядае рэаліям, які склаліся на сёння. То-бок, Расія паўтарыць той фокус, які быў у лютым 2022 года з тэрыторыі Беларусі, проста тэхнічна не можа. Яна не мае чым гэта зрабіць», — адзначыў Магда.
Каментары