Пазняк асудзіў Ціханоўскага: Седзячы пяць гадоў, можна было да беларускай мовы звярнуцца
Адказваючы на пытанне пра Сяргея Ціханоўскага ў інтэрв'ю «Белсату», ветэран беларускага руху Зянон Пазняк заявіў, што «гэты балаган праз месяц-паўтара скончыцца».
— Адзін з тых, каго вызваліў Лукашэнка, быў Сяргей Ціханоўскі. Якая была вашая першая рэакцыя, а якая пасля таго, як Ціханоўскі аб’явіў, што збірае каманду, каб за тры тыдні зрынуць рэжым Лукашэнкі. Нанесці ўдар. Бо вы казалі, што да зменаў у Беларусі можа прывесці толькі нейкі радыкальны шлях развіцця падзеяў.
— Я назіраў за ім у 2020 годзе. Нават пісаў, спадзяваўся, што нават з яго можа нешта быць. Бо мая задача была выцягнуць яго з гэтага рускага балота. Не ўпэўнены, што ён гэта чытаў. Але тое, што я зараз пабачыў, то гэты балаган праз месяц-паўтара скончыцца. Гэта поўнае неразуменне чалавека, куды ён трапіў, што ён робіць і дзе ён ёсць. Я паслухаў ягоны выступ, дзе ён каманду стварае, 10 тысяч просіць. Трэба браць гэтае відэа і ў кінафільм пра Астапа Бэндэра. Чалавек нічога не разумее.
— Але ён выйшаў з турмы…
— Так, выйшаў з турмы, і калі не разумееш, то пастарайся зразумець. Ты не ў Беларусі, зараз не 2020 год, не ідзе электаральная кампанія, гэта замежжа.
Як вы можаце, малады чалавек, зрынуць рэжым адсюль у Беларусі? Мітынгамі? Дэманстрацыямі? Ён не разумее ўвогуле.
І на што ты просіш грошы? Якая каманда? Была такая цікавая заўвага. Жонка ягоная яго канечне любіць, але грошы не дае.
— Вы закідалі Сяргею Ціханоўскаму, што ён мусіць разлічыцца з рускім мірам. Але Сяргей Ціханоўскі публічна асудзіў расейскую агрэсію і казаў пра тое, што хоча палепшыць стан сваёй беларускай мовы. Ці гэтага не дастаткова?
— Гэтага не дастаткова. Гэта проста рыторыка. Сяргей Ціханоўскі ўдзельнічаў у крэмлёўскай афёры ў 2020 годзе. Гэтая афёра каштавала дорага беларускаму народу. І рэпрэсіі, і забойствы. Свядома ці несвядома — гэта другая справа. Я лічу, што яго выкарысталі тады. Але ён заяўляў тады публічна пра прыналежнасць да рускага міру, не раз.
— Але цяпер заяўляе адваротнае…
— Гэта мала заявіць. Ён заяўляе, што не трэба яму беларуская мова, Лукашэнка яе знішчыў. Гэта не праўда. Пяць гадоў седзячы можна было да беларускай мовы звярнуцца. Цяпер ідзе вайна рускага міру. Рашызм — гэта страшней чым фашызм. Рашызм робіць стаўку на рускую мову. І таму гэта палітыка. Неразуменне гэтых пытанняў на бытавым узроўні можа быць, але калі ты пайшоў у палітыку, такія рэчы трэба разумець. Калі вы гэтага не разумееце, значыць вы засталіся ў рускім міры.
За Крым, за ўсе гэтыя паходы як там кажуць, за гэтыя відэа, якія паказвалі Нью-Ёрк, за ўсё гэта трэба адказваць.
Гэта не жарты, гэта не дэманстрацыі пачуццяў. За палітыкай стаяць жыцці, лёсы цэлых нацыяў. Калі ён не разумее, то кажа «дайце мне 200 даляраў». Я паўтараю: гэты балаган скончыцца за месяц-паўтара. Гэта поўны балаган што зараз адбываецца.
Каментары