Брэсцкі школьнік перамог у Міжнароднай геаграфічнай алімпіядзе. Яго мама расказала, як вырасцілі генія
Праз тыдзень Мікалая Місіюка чакае другая міжнародная алімпіяда — па навуках аб Зямлі ў Пекіне.
Выпускнік гімназіі №2 Брэста Мікалай Місіюк стаў абсалютным пераможцам Міжнароднай геаграфічнай алімпіяды.
«Люблю! Цалую! Ганаруся! Плачу ад шчасця!» — такое кранальнае паведамленне адправіла сыну Наталля Місіюк, як толькі пачула пра перамогу.
«Як толькі пасадзіла Колю ў самалёт, была на валяр'янцы», — расказала «СБ» мама алімпіядніка.
Яна згадвае, як глядзела цырымонію ўзнагароджання.
«Цырымонія вялася на англійскай, у першыя секунды я нават не зразумела, што назвалі наша прозвішча. Прыйшло ўсведамленне — і слёзы пырснулі з вачэй».
Наталля Валер'еўна прызнаецца, што сын заўсёды здзіўляў навакольных сваімі здольнасцямі:
«Неяк прыйшла ў дзіцячы сад, а выхавальнік мяне нахвальвае, маўляў, якая мама малайчына, навучыла дзіця ў чатыры гады чытаць. У мяне шок: ён жа нават літары не ведае. Педагог ад майго адказу сама разгубілася. Мы Колю за руку — і да раскладу заняткаў. А ён вазьмі і ўсё без запінкі прачытай! У гэтым жа ўзросце мы падарылі яму інтэрактыўную карту — ён ўмомант вывучыў назубок усе краіны і кантыненты.
Памятаю, на сямейных святах сваякі тэставалі: паказвалі розныя сцягі, а ён без памылак усё называў. Куды б мы ні ездзілі, з падарожжаў прывозілі не цацкі або прысмакі, а геаграфічныя карты гарадоў, рэгіёнаў і дзяржаў».
Хлопца ніколі не выхоўвалі ў строгасці. Бацькі нават не правяралі ўрокі. Калі Мікалай тройчы запар станавіўся прызёрам рэспубліканскай алімпіяды, потым абсалютным пераможцам Еўрапейскай геаграфічнай Алімпіяды ў Сербіі і срэбным прызёрам Міжнароднай геаграфічнай Алімпіяды ў Ірландыі, мама вырашыла абмеркаваць з ім важную тэму:
«Сказала: «Кожны чалавек праходзіць выпрабаванні агнём, вадой і меднымі трубамі. У тваім жыцці гэта слава і вядомасць. Якія б выпрабаванні ні здараліся на шляху, важна заставацца чалавекам!» Коля нават пакрыўдзіўся: «Мама, ну ты што! Зорнасць — гэта не пра мяне».
Настаўнік геаграфіі гімназіі №2 Брэста Юлія Багдасарава, якая вучыла Мікалая з шостага класа, кажа, што ў хлопца ніколі не было рэпетытара ні па адным прадмеце, пры гэтым сярэдні бал атэстата — 10.
Геаграфіяй школьнік займаўся па 7-8 гадзін на дзень, дадае настаўніца.
Сёлета Мікалай паступіў без экзаменаў на факультэт геаграфіі і геаінфарматыкі БДУ. А праз тыдзень яго чакае другая міжнародная алімпіяда — па навуках аб Зямлі ў Пекіне. У ёй можна ўдзельнічаць толькі адзін раз у жыцці.
Каментары