Сайт «Укантакце» рашэннем КДБ унеслі ў спіс рэсурсаў для абмежаванага доступу, праз некаторых аператараў ён ужо перастаў адчыняцца. На навіну адразу адрэагавалі блізкія да сілавікоў і праўладныя каналы.
Канал «Беларускі сілавік» адразу запэўніў, што здарэнне адбылося па «тэхнічнай памылцы».
«Доступ сапраўды абмежаваны, але, як мне падказалі, праз тэхнічную памылку. Сітуацыя неўзабаве будзе выпраўленая. Хутчэй за ўсё, была памылка з унясеннем у спіс абмежавання асобнага профілю/групы», — сказана ў канале.
Пазней «Беларускі сілавік» дапоўніў: desktop-версія сацсеткі не працуе, бо кампанія не выканала патрабаванні дзяржаўных органаў. «ВК не захацеў улічваць інтарэсы Беларусі і заляцеў у блок».
Адміністратары «Жоўтых зліваў» таксама звярнулі ўвагу на «канкрэтныя патрабаванні заканадаўства».
«Проста ёсць пэўныя патрабаванні заканадаўства, не выконваючы якія ў Беларусі працаваць немагчыма. Праблема менавіта ў неадпаведнасці нашым тэхнічным умовам. Як толькі праблема будзе ліквідаваная, доступ адразу будзе адноўлены.
Мы ўпэўненыя, што гэта адбудзецца ў найбліжэйшы час. Але тут ужо ад адміністрацыі «Укантакце» залежыць, наколькі хутка пытанне будзе вырашана».
З найбольшай іроніяй на навіну адрэагаваў канал, блізкі да ГУБАЗіК.
Пра блакіроўку «Укантакце» стала вядома ўвечары 24 кастрычніка. Рашэннем КДБ сайт унеслі ў спіс для рэсурсаў з абмежаваным доступам.
Па інфармацыі БелТА, цяпер у Беларусі не працуе толькі desktop-версія сацсеткі, на мабільнай прыладзе «Укантакце» працягвае адчыняцца.
Прэс-служба сацсеткі паведаміла, што кампанія «вывучае сітуацыю» і робіць усё неабходнае, каб аднавіць доступ да платформы ў Беларусі, аднак не раскрыла прычыны па якім адбылася блакіроўка.
Каментары