Беларускі пасол у Славакіі Ігар Фісенка 21 кастрычніка ўручыў даверчыя граматы прэзідэнту гэтай краіны Петэру Пелегрыні. Пра гэта паведаміла Міністэрства замежных спраў Беларусі.
Беларусь не мела пасла ў Славакіі з 2020 года. Аляксандр Лукашэнка прызначыў Ігара Фісенку на гэтую пасаду 3 сакавіка 2026 года — праз пяць гадоў пасля адстаўкі папярэдняга пасла Ігара Ляшчэні, які ў 2020 годзе падтрымаў патрабаванне правесці ў Беларусі новыя свабодныя выбары.
Увосень 2023 года Беларусь увогуле закрыла сваю амбасаду ў Славакіі. Пра планы аднавіць яе дзейнасць стала вядома ў лістападзе 2025 года. Меркавалася, што прадстаўніцтва запрацуе да 1 верасня 2026 года. З вясны Ігар Фісенка ўжо жыў у Браціславе.
Фісенка скончыў Маскоўскі дзяржаўны інстытут міжнародных адносін і працуе ў беларускім МЗС з 1994 года. Ён працаваў у беларускай амбасадзе ў Бельгіі, быў пастаянным прадстаўніком пры Еўрасаюзе і НАТА, а пазней узначальваў дыпламатычныя місіі ў Егіпце, Амане, Судане і Алжыры. З 2019 года быў паслом Беларусі ў Францыі, адначасова прадстаўляючы краіну ў Манака і Партугаліі, а таксама пры ЮНЕСКА ў Парыжы. У 2021 годзе ён застаўся толькі на апошняй пасадзе.
Да восені 2023 года Славакія паслядоўна крытыкавала беларускія ўлады і далучалася да ўсіх еўрапейскіх санкцый, але сітуацыя змянілася пасля парламенцкіх выбараў 2023 года, на якіх перамагла партыя Роберта Фіцы.
У маі 2025 года Славакія прызначыла сваім паслом у Беларусі Ёзафа Мігаша, які займаў гэтую пасаду і да 2020 года і вядомы сваёй прыязнасцю ў дачыненні да рэжыму Лукашэнкі. У верасні таго ж года ён уручыў даверчыя граматы Аляксандру Лукашэнку. Цяпер Славакія і Венгрыя — адзіныя краіны Еўрасаюза, якія маюць у Беларусі паўнавартасных паслоў.
Цяпер чытаюць
Соф'я Сапега: Пратасевіч нагаварыў на мяне цэлы том крымінальнай справы33
Соф'я Сапега: Пратасевіч нагаварыў на мяне цэлы том крымінальнай справы
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары