У 46 год памёр віцэ-прэзідэнт EPAM, адзін з кіраўнікоў бізнэсу ў Паўночнай Амерыцы Алег Вільчынскі
Па словах знаёмых, Алега не стала ў выніку хваробы, з якой ён змагаўся цягам апошніх гадоў.
«Неверагодна мэтанакіраваны, прагны да ведаў, дапытлівы, рызыковы — ён заўсёды імкнуўся быць першым. Алег заставаўся такім да самага канца. Ён стаў адным з тых, хто пабудаваў EPAM, і адным з тых, хто вызначаў будучыню кампаніі. Калега расказаў мне, што Алег пачуваўся няважна, але пры гэтым быў цалкам уцягнены ў працу і цвёрда верыў, што дасць рады з «усім гэтым», — напісаў на сваёй старонцы ў Linkedin заснавальнік EPAM Аркадзь Добкін, выказваючы спачуванні жонцы Алега Таццяне і ўсёй яго сям’і.
Алег Вільчынскі нарадзіўся ў Наваполацку, скончыў Школу бізнэсу і тэхналогій кіравання БДУ, атрымаў ступень MBA. Пасля сканчэння IT-курсаў пачаў кар’еру ў якасці інжынера-праграміста на «Інтэграле».
У EPAM мужчына прыйшоў больш за 20 год таму — стартаваў з пазіцыі старэйшага бізнэс-аналітыка і дарос да пазіцыі віцэ-прэзідэнта, адказнага за кірункі бізнэсу ў Паўночнай Амерыцы.
Апошнія 16 год Вільчынскі жыў у Нью-Ёрку. Вядома, што ў яго засталася непаўналетняя дачка.
«У яго былі планы — расці далей і зрабіць яшчэ вельмі шмат чаго. Гэта неверагодна несправядліва — сысці ў 46 гадоў»;
«Ён ніколі не сядзеў доўга на адным месцы, актыўна падарожнічаў і працаваў з кліентамі з розных краін», — адмаўляюцца верыць у заўчасную смерць Алега калегі.
Каментары