«Проста ваў!» Вікіпедыст уразіўся, як хвацка ШІ ўжо чытае мудрагелістыя рукапісы тарашкевіцай
Рэдактар беларускай Вікіпедыі Уладзіслаў Чаховіч падзяліўся ў фэйсбуку сваім досведам працы з новай версіяй ШІ-праграмы Gemini. Ён «скарміў» праграме скан аркуша, на якім вядомы беларускі грамадска-палітычны і рэлігійны дзеяч 1‑й паловы XX стагоддзя Адам Станкевіч выклаў свой тастамент. Вынік пераўзышоў усе чаканні.
«Яшчэ адзін ШІ-рубеж пройдзены. Загружаў фотаздымкі з анлайн-выставы, прысвечанай Адаму Станкевічу, у Вікісховішча і з інтарэсу вырашыў праверыць, ці можа новы Gemini 4 Argon, які ўжо паспеў уразіць працай з крыніцамі, прачытаць кірылічны беларускі тэкст, запісаны дарэформавым правапісам.
Раней быў уражаны, як нейрасеткі бралі самыя мудрагелістыя лацінскія почыркі, але на кірылічных ламалі коп'і», — піша Уладзіслаў Чаховіч.
Цяперашні ж вынік яго вельмі прыемна здзівіў:
«Проста ваў! Асабліва ўразіла, што ён разабраў слова «хусьцё», не прыдумаўшы нейкае іншае. Як ён прачытаў слова «Дзень» у канцы, мне цяжка зразумець.
Глядзіце самі:
«Мая апошняя воля.На выпадак прымусовага майго выезду із Вільні, або на выпадак сьмерці маей, усю маю рухомую маемасьць (бібліятэку, адзежу, хусьцё, радыё, пішучую машынку і ўсё іншае) перадаю Марыяне і Ганне Шутавічанкам (Вільня, Полацкая вул. 9—4) на іх поўную ўласнасьць. Гэта мая ім скромная падзяка (асабліве Марыяне Ш.) за іх доўгалетнюю безінтарэсоўную для мяне працу і апеку. Адносіны нашы заўсёды былі самыя чыстыя і шчыра прыязныя. У маей доўгалетняй працы на ніве Божай і беларускай народнай мае сьлёзы і мая радасьць былі такса іх сьлязьмі і іх радасьцю. Сэрца маё да іх поўнае ўдзячнасьці і прыязьні. Паручаю іх Божай Апецы і сам паручаюся іх малітвам і іх мілай памяці. Паручаю такса іх памяці сваю дарагую старушку Матку і дачушку маей нябошчыцы сястры Ганны малалетнюю Вальцю.
Сьвятар Адам Станкевіч, уласнаручна.
Вільня, 7.VII.1944, у Дзень Апосталаў Славян сьвятых братоў Кірыла і Мяфода».
Каментатары да паста таксама ўразіліся такой высокай якасцю расчытання не самага разборлівага почырку. Адзін з іх, праўда, звярнуў увагу, што ШІ замест прысутнага ў арыгінале слова «такжа» два разы ўсё ж такі напісаў няправільнае «такса». Сам аўтар допіса таксама адзначыў, што ў арыгінале імя Марыяна было напісана з дзвюма літарамі «н», а ў версіі Gemini стала з адной (што, дарэчы, адпавядае цяперашняй літаратурнай норме). Але агульнай пазітыўнай карціны гэтыя дробязі не псуюць.
Geely паставіць у свае машыны сэрвісы Google і Gemini
Выйшла новая Gemini 4 Argon. Яна будуе рэалістычныя 3D-сімуляцыі і пакадрава аналізуе відэа
Google запусціла Gemini 3.5 Transcribe для расшыфроўкі мовы. У спісе ёсць і беларуская
Беларускі лічбавы голас больш не будзе рэзаць слых няправільнымі націскамі. Нейрасетку нарэшце навучылі адрозніваць «мУку» ад «мукІ»
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна44
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1313
Каментары