Мітрапаліт Веніямін прапанаваў узгадніць магчымы візіт Папы Льва ХIV у Беларусь з патрыярхам Кірылам
Магчымы візіт Папы Льва XIV у Беларусь павінен абмяркоўвацца з кіраўніком РПЦ, патрыярхам Маскоўскім і ўсёй Русі Кірылам з улікам меркавання сінода Беларускай праваслаўнай царквы. Пра гэта заявіў кіраўнік Беларускай праваслаўнай царквы Веніямін на сустрэчы са спецыяльным пасланнікам Папы кардыналам Клаўдыа Гуджэроці 27 кастрычніка.
На сустрэчы Веніямін падкрэсліў, што Гуджэроці ведаюць у Беларусі і цэняць яго намаганні па ўмацаванні пазітыўнага вобразу Беларусі за мяжой. Суразмоўцы абмеркавалі «духоўную і рэлігійную сітуацыю ў свеце, становішча хрысціянаў у краінах Блізкага Усходу, а таксама нібыта ўціск Украінскай праваслаўнай царквы», паведамляе прэс-служба БПЦ.
Бакі адзначылі станоўчую ролю ўзаемадзеяння БПЦ і Касцёла ў Беларусі і пагадзіліся, што важна захоўваць добрыя і даверлівыя адносіны «ў умовах няпростай сітуацыі ў свеце».
На сустрэчы абмяркоўвалася пытанне візіту Папы ў Беларусь. Веніямін адзначыў, што такі візіт у любую краіну — асаблівая падзея, і прапанаваў абмеркаваць яго з кіраўніком РПЦ патрыярхам Кірылам, бо большасць вернікаў у Беларусі — праваслаўныя. БПЦ знаходзіцца ў юрысдыкцыі Маскоўскага патрыярхата.
«У Беларусі адносіны Царквы і Касцёла складаюцца станоўчым чынам, нягледзячы на папярэднія складаныя перыяды ў айчыннай гісторыі. Бакі пагадзіліся, што неабходна ўлічваць факт таго, што ў краіне большасць вернікаў належыць да Беларускай праваслаўнай царквы Маскоўскага патрыярхата, і важна, каб тэма візіту абмяркоўвалася таксама са Свяцейшым патрыярхам Маскоўскім і ўсёй Русі Кірылам і з улікам меркавання сінода Беларускай праваслаўнай царквы», — заяўляе БПЦ.
Гуджэроці прыбыў у Беларусь 25 кастрычніка на святкаванне 100‑годдзя Пінскай епархіі, на выходных ён браў удзел ва ўрачыстасцях у Пінску і Брэсце.
У панядзелак ён сустрэўся з Аляксандрам Лукашэнкам і кіраўніком МЗС Максімам Рыжанковым.
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?19
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары