Многія пацыенты звяртаюцца да розных біядабавак і прэпаратаў у надзеі палепшыць стан апорна-рухальнага апарата, аднак медыцынскі погляд на іх дзейснасць часта адрозніваецца ад рэкламных абяцанняў. Доктар Уладзімір Пікірэня расказаў пра механізмы дзеяння папулярных сродкаў для суставаў і патлумачыў, чаму іх прыём можа не прынесці чаканай карысці.
Ці карысныя для суставаў хандраіцін і гіялуронавая кіслата
Хандраіцін і гіялуронавая кіслата — найбольш раскручаныя рэчывы ў галіне лячэння суставаў. З навуковага пункту гледжання абодва яны адносяцца да глікагазамінагліканаў — групы доўгіх вугляводаў (поліцукрыдаў).
Як адзначае Пікірэня, нават па сваім механізме гэтыя рэчывы проста не могуць прыносіць якога-небудзь эфекту пры прыёме ўнутр. Справа ў тым, што поліцукрыды, трапляючы ў страўнікава-кішачны тракт, распадаюцца на больш кароткія складнікі — алігацукрыды, дыцукрыды і монацукрыды. У выніку ў кроў яны трапляюць у выглядзе звычайнай глюкозы і далей выкарыстоўваюцца арганізмам на ўласныя патрэбы: пабудову тлушчавай тканкі або ў якасці крыніцы энергіі.
Эксперт даводзіць, што ўсе калорыі, атрыманыя чалавекам ад з'едзенай гіялуронавай кіслаты і хандраіціну, ідуць проста на забеспячэнне жыццядзейнасці. Ніякага спецыфічнага ўплыву на суставы, змяншэнне болю ці паляпшэнне якасці скуры пры гэтым не адбываецца.
Для атрымання эфекту гіялуронавая кіслата павінна быць уведзена праз філеры ці ін'екцыі непасрэдна пад скуру. У якасці прыкладу доктар прыводзіць гепарын — рэчыва з той самай групы і з падобным механізмам дзеяння. Ён прызначаецца для змяншэння тромбаўтварэння, але ніколі не ўжываецца ў выглядзе таблетак, а толькі ў ін'екцыях, паколькі інакш ён не дзейнічае.
Ці карысныя для суставаў калагены
Яшчэ адным вядомым сродкам, на які звяртае ўвагу спецыяліст, з'яўляецца калаген. Гэта бялок, які складае прыкладна 20—30% ад масы цела чалавека і ў вялікай колькасці змяшчаецца ў мясных прадуктах.
Як адзначае Пікірэня, у працэсе стрававання пад уздзеяннем страўнікавага соку і ферментаў падстраўнікавай залозы калаген, як і любы іншы бялок, распадаецца на амінакіслоты. Адпаведна, той калаген, які чалавек спажывае ў выглядзе дабавак, ніякім чынам не можа ў нязменным выглядзе трапіць у суставы ці скуру.
«Такая самая карысць будзе ад з’едзеных капсул з калагенам як ад сальцісону», — адзначае Пікірэня.
Больш за тое, каля 30% амінакіслот у складзе калагена прыпадае на гліцын. Па словах доктара, замест куплі дарагіх прэпаратаў можна проста з'есці свіныя вушы, сальцісон ці нават звычайную курыную грудку. У 100 грамах курынай грудкі ўтрымліваецца істотна больш гліцыну, чым у цэлай упакоўцы аптэчнага прэпарату.
Ці карысны для суставаў алфлутоп
Прэпарат пад назвай «Алфлутоп» прадаецца як раствор для ін'екцый непасрэдна ў суставы. Эксперт звяртае ўвагу на склад леку: 90% вады і 10% булёну з дробных рыб, такіх як шпроты і анчоўсы.
Як даводзіць Пікірэня, фактычна пацыентам прапануецца ўводзіць у сустаў «адфільтраваную юшку», што наўрад ці можа дапамагчы пры болях.
Ён падкрэслівае, што ніякіх даследаванняў — ні міжнародных, ні якасных мясцовых — якія б пацвярджалі эфектыўнасць гэтага сродку, не існуе. «Сустаў — гэта месца, дзе не павінна быць бактэрый, пашкоджанняў і гэтак далей. А калі робіцца ін'екцыя — гэта заўсёды рызыка дадатковых пашкоджанняў. Таму гэта тое, што дакладна нельга спрабаваць пры праблемах з суставамі», — адзначае эксперт.
Што сапраўды дапамагае суставам?
Замест марнавання грошай на фуфламіцыны, доктар рэкамендуе засяродзіцца на рэальных метадах прафілактыкі і падтрымкі.
1. Актыўны лад жыцця і правільныя нагрузкі. Для суставаў карысныя рухі без моцнага трэння і вертыкальнай кампрэсіі. Ідэальны варыянт — басейн. Плаванне забяспечвае актыўны рух, паляпшае крываток, але пры гэтым паверхні суставаў не сціскаюцца і не труцца адна аб адну пад цяжарам цела.
2. Нармалізацыя вагі. Лішняя вага стварае каласальную нагрузку на калені, тазасцегнавыя суставы і хрыбет. Ніякія біядабаўкі не змогуць кампенсаваць фізічнае разбурэнне суставаў пад залішняй масай.
3. Адмова ад курэння, якое негатыўна ўплывае на сасуды і кровазварот, што наўпрост пагаршае харчаванне сустаўнай тканкі.
Прытрымліванне гэтых простых правілаў прынясе вашаму арганізму значна больш карысці, чым любыя модныя прэпараты.
Дабаўкі з калагенам сталі папулярныя ў жанчын. Але ці працуюць яны? Вось што паказваюць даследаванні
«Людзі ідуць у мячэці, а не лечаць псіхічныя хваробы». Беларускі псіхіятр расказаў аб працы ва Узбекістане і ў Польшчы
Беларускі псіхіятр: Паліграф з 100 хлусаў не выявіць двух. А семярых тых, хто кажа праўду, абвінаваціць у хлусні — і гэта па аптымістычных ацэнках
«Шматпартыйнасць, плюралізм меркаванняў — гэта брахня, заходняя брахня». Лукашэнка разглядае канстытуцыйнае вяртанне да савецкай сістэмы74
Каментары
Во всём разбирается.
Круто!