Беларускіх прапагандыстаў будуць вучыць барацьбе з фэйкамі за грошы ЕС
Працаўнікоў беларускіх дзяржаўных СМІ запрашаюць у сталіцу Балгарыі на мерапрыемства «Штучны інтэлект і барацьба з фэйкавымі навінамі». Дыскусія фінансуецца Еўрасаюзам.
Абвестку пра мерапрыемства ў балгарскай Сафіі распаўсюдзіла агенцтва «Мінск-Навіны». «Саюз балгарскіх журналістаў запрашае прадстаўнікоў Беларускага саюза журналістаў прыняць удзел у дыскусіі на тэму «Штучны інтэлект і барацьба з фэйкавымі навінамі: якое рашэнне будзе найбольш эфектыўным?» — гаворыцца ў ёй, заўважыў БАЖ.
Хто будзе вучыць барацьбе з непраўдзівымі навінамі рэжымных прапагандыстаў?
Як стала вядома БАЖ, у мерапрыемстве ўдзельнічаюць старшыня праўлення Саюза балгарскіх журналістаў (СБЖ) Сняжана Тодарава, сябры СБЖ, прадстаўнікі агульнаеўрапейскага партала Eualive.net і праекта EU4Debunk Георгі Гоцеў і Каліна Ангелава. Месца ў Сафіі дае СБЖ.
Саюз балгарскіх журналістаў — адна з дзвюх журналісцкіх арганізацый Балгарыі, якая падкрэслена працягвае супрацоўнічаць з беларускімі і расійскімі афіцыйнымі медыя.
Кіраўніца СБЖ Сняжана Тодарава мае ў сваёй краіне рэпутацыю прыхільніцы Расіі. Яна атрымала ордэн Дружбы ад Уладзіміра Пуціна ў верасні 2025 года, часта наведвае Расію і Беларусь. Яшчэ ў 2014 годзе ў інтэрв’ю парталу «Столетие» Тодарава заявіла, што «адраджэнне фашызму і наступ бандэраўцаў пужаюць балгар». Надалей, гледзячы па выступах, яе погляды не змяняліся.
Разам з тым сайт Саюза балгарскіх журналістаў дастаткова падрабязна пісаў пра беларускія пратэсты 2020 года, зараз перадрукоўвае навіны пра Анджэя Пачобута і пра іншых беларускіх журналістаў у зняволенні.
Паводле балгарскіх расследавальніцкіх рэсурсаў, у 2009 годзе Камісія архіваў раскрыла інфармацыю пра сувязі Тодаравай з Шостым упраўленнем Службы дзяржаўнай бяспекі па барацьбе з ідэалагічным сабатажам.
Тодарава, паводле звестак балгарскіх СМІ, дзейнічала пад псеўданімам «Віялета» ў савецкай Балгарыі з 1988 года і да змены дзяржаўнага ладу. На канец 80‑х Тодарава кіравала міжнародным аддзелам у Саюзе балгарскіх рабочых.
Акрамя кіроўнай пасады ў СБЖ, Сняжана Тодарава таксама ўзначальвае Каардынацыйны савет «Балгарыя — Расія» пры «Роскангрэсе», недзяржаўным расійскім фондзе, класічнай арганізацыі «мяккай сілы».
За чые грошы навучанне ў Сафіі?
Агульнаеўрапейскі партал Eualive.net, які быў створаны ўвесну 2025 года ў межах праекта EU4Debunk, юрыдычна зарэгістраваны ў Бруселі. Ім кіруе грамадзянін Бельгіі і Балгарыі Георгі Гоцеў, чыя пошта якраз пазначаная на сайце «Мінск-Навіны» для рэгістрацыі на антыфэйкавую дыскусію.
«Місія EUalive.net — паглыбіць разуменне грамадскасцю таго, што адбываецца ў ЕС, у дзяржавах-сяброўках і краінах-кандыдатах для шырокай глабальнай аўдыторыі. EUalive выбудоўвае партнёрскія зносіны ў сферы кантэнту са СМІ, НДА і аналітычнымі цэнтрамі. Мы падтрымліваем моцную, адзіную Еўропу, захоўваючы пры гэтым крытычнае стаўленне да інстытутаў ЕС. Наша пазіцыя адносна таго, хто з’яўляецца агрэсарам у вайне ва Украіне, цалкам зразумелая», — заяўляе Eualive.net.
А праект AI4Debunk, у межах якога дзейнічае Eualive.net і праводзіцца канферэнцыя ў Сафіі, «аб’ядноўвае міждысцыплінарны кансорцыум, які ахоплівае шырокае кола дысцыплін — ад сацыёлагаў і спецыялістаў у галіне СМІ да распрацоўнікаў праграмнага забеспячэння і экспертаў па штучным інтэлекце і машынным навучанні, — з мэтай усебаковага вывучэння ўсяго спектра працэсаў дэзінфармацыі».
Узначальвае кансорцыум AI4Debunk у якасці каардынатара Латвійскі ўніверсітэт у Рызе.
На сайце AI4Debunk пазначана, што яго дзейнасць фінансуецца Еўрасаюзам, «аднак выяўленыя тут погляды і меркаванні належаць выключна аўтару (аўтарам) і не абавязкова адлюстроўваюць погляды Еўрапейскага саюза ці Еўрапейскай камісіі, ні Еўрапейскі саюз, ні Еўрапейская камісія не нясуць за іх адказнасці».
Паводле звестак БАЖ, за кратамі ў Беларусі цяпер знаходзяцца 28 прадстаўнікоў і прадстаўніц медыя.
Цяпер чытаюць
Медыйны прэс-сакратар МНС Віталь Дамбоўскі пайшоў у псіхолагі-сэксолагі3
Каментары
"Беларускіх прапагандыстаў будуць вучыць барацьбе з фэйкамі за грошы ЕС"