Іран на 10 дзён адкрыў Армузскі праліў для ўсіх суднаў. Цэны на нафту паляцелі ўніз
На час 10‑дзённага перамір’я паміж Ізраілем і Ліванам Армузскі праліў будзе адкрыты для ўсіх суднаў без выключэння, заявіў кіраўнік іранскага МЗС Абас Аракчы ў сацсетцы X.
«У адпаведнасці са спыненнем агню ў Ліване праход для ўсіх камерцыйных суднаў праз Армузскі праліў аб’яўляецца цалкам адкрытым на астатні перыяд спынення агню па ўзгодненым маршруце, які быў раней аб’яўлены Арганізацыяй партоў і марскога судаходства Ісламскай Рэспублікі Іран», — напісаў Абас Аракчы.
На фоне гэтай навіны цэны на нафту імгненна паляцелі ўніз.
Чэрвеньскія ф’ючарсы на нафту маркі Brent упалі на 10,5%, да $88,96 на фоне навіны пра адкрыццё Армузскага праліва, вынікае з даных лонданскай біржы ICE Futures.
Кошт ф’ючарсаў на амерыканскую нафту WTI на таргах Нью-Ёркскай таварнай біржы NYMEX упаў на 9% і дасягнуў $82,9 за бараль.
Іран раней падкрэсліваў, што спыненне атак на Ліван з’яўляецца важнай умовай будучага мірнага пагаднення. Пры гэтым у Тэгеране падаюць перамір’е як поспех праіранскай групоўкі «Хезбала», якая мае значны ўплыў у Ліване.
Пра спыненне агню з 17 красавіка ўчора заявіў таксама прэзідэнт ЗША Дональд Трамп. Ён адзначыў, што ЗША хочуць арганізаваць першую за доўгі час асабістую сустрэчу лідараў Ізраіля і Лівана.
Цяпер жа Трамп падзякаваў Ірану за адкрыццё Армузскага праліва ў пасце на сваёй платформе Truth Social, пры гэтым назваўшы праліў «пралівам Ірана»:
«Іран толькі што аб’явіў, што праліў Ірана цалкам адкрыты і гатовы да свабоднага праходу. Дзякуй!»
Паводле крыніц выдання Axios, паралельна прасоўваюцца і перамовы паміж ЗША і Іранам. Абмяркоўваецца магчымасць размарозкі каля 20 мільярдаў даляраў іранскіх сродкаў у абмен на адмову Ірана ад запасаў урану.
Еўрапейскія краіны і дзяржавы Персідскага заліва, якія ўжо адчулі наступствы канфлікту, зацікаўленыя ў падаўжэнні перамір’я і захаванні суднаходства праз праліў. Таксама плануецца сустрэча еўрапейскай кааліцыі, дзе будуць абмяркоўваць доўгатэрміновыя меры для стабільнасці ў рэгіёне.
Каментары