Расійскі дэпутат Дзярждумы Віталь Мілонаў расказаў, што забіваў на вайне супраць Украіны
«Вы забівалі людзей?» — «Так».
Дэпутат Дзярждумы ад «Адзінай Расіі» Віталь Мілонаў заявіў, што забіваў людзей на расійска-украінскай вайне. Пра гэта ён расказаў у інтэрв'ю блогеру Амірану Сардараву, піша «Медуза».
Сардараў спытаў Мілонава, ці праўда ў яго ёсць ордэн Мужнасці, атрыманы на вайне. Дэпутат пацвердзіў, што ордэн яму далі за «баявыя дзеянні», але не стаў раскрываць дэталі, бо прэзідэнцкія ўказы аб узнагароджанні «маюць закрыты характар». За гэтым рушыў услед такі дыялог:
Сардараў: Вы забівалі людзей?
Мілонаў: Так.
Сардараў: На СВА?
Мілонаў: Так. Я ж старэйшы наводчык. Старэйшы наводчык гарматы МТ-12 «Рапіра», якая знаходзіцца ў двух-трох кіламетрах ад лініі фронту, ад перадавой. <…> Задача гарматы — знішчаць жывую сілу і тэхніку праціўніка.
Сардараў: А з гэтым не складана потым жыць?
Мілонаў: Не. Гэта абавязак цябе як вайскоўца. Вы думаеце, калі б я іх не забіў, яны прыйшлі б да нас і чай бы з намі пілі? Не, вядома.
Віталь Мілонаў пайшоў на фронт добраахвотнікам у кастрычніку 2022 года і служыў у супрацьтанкавай артылерыйскай батарэі. У лютым 2023‑га ён паведаміў, што тэрмін яго кантракту падышоў да канца. У Дзярждуме Мілонаў займае пасаду намесніка старшыні камітэта па абароне сям'і, пытаннях бацькоўства, мацярынства і дзяцінства.
На вайне ва Украіне летась загінуў яго брат Аляксандр.
Віталь Мілонаў — адыёзны расійскі дэпутат, які стаў вядомым праз свае законапраекты. У розныя часы ён выступаў супраць гомасексуальных адносін, Еўропы, фастфуду, Вольгі Бузавай і тэорыі эвалюцыі.
Каментары
[Зрэдагавана]