Эвакуяваныя 10 тысяч чалавек.
Вынікам моцнага землятрусу на поўдні Японіі, на востраве Кюсю, які адбыўся ў аўторак, стала гібель прынамсі 13 чалавек, паведаміла прэм'ер-міністр краіны Санаэ Такаіці, піша Бі-бі-сі.
Паводле даных уладаў прэфектуры Кумамота, дзе адбылася трагедыя, эвакуяваныя амаль 10 тысяч чалавек. Без электразабеспячэння засталіся каля 37 тысяч хатніх гаспадарак.
Раней паведамлялася пра гібель дзвюх жанчын, якія знаходзіліся ў гандлёвым цэнтры Aeon Mall у Кумамота, што абрынуўся. Яшчэ адзін чалавек памёр у выніку спынення сэрца.
Магнітуда землятрусу, які адбыўся ў глыбіні вострава Кюсю ў 16:27 па мясцовым часе ў аўторак (10:27 паводле Мінска), склала 7,1.
Выступаючы перад журналістамі ў сваім офісе ў Токіа неўзабаве пасля трагедыі, Санаэ Такаіці заявіла, што ў выніку стыхіі былі пашкоджаныя дарогі і масты.
«Па просьбе губернатара прэфектуры Кумамота Сілы самаабароны цяпер праводзяць аперацыі ў пацярпелых ад стыхійнага бедства раёнах сіламі 3600 чалавек. У гэтай крытычнай сітуацыі, кіруючыся прынцыпам «жыццё чалавека — найвышэйшая каштоўнасць», мы цесна супрацоўнічаем з мясцовымі ўладамі, каб максімальна зменшыць маштаб наступстваў і забяспечыць бяспеку насельніцтва».
Японскае метэаралагічнае агенцтва папярэдзіла пра моцныя афтэршокі ў сувязі з невялікай глыбінёй ачага землетрасення — 10 км. Паводле інфармацыі агенцтва, у аўторак пасля асноўнага штуршка быў зафіксаваны 61 афтэршок.
Разам са шкалой магнітуды ў Японіі выкарыстоўваецца ўласная шкала сейсмічнай інтэнсіўнасці, якая вар'іруецца ад 0 да 7. Штуршкі нулявой інтэнсіўнасці людзі не адчуваюць, а інтэнсіўнасць 7 азначае, што мэбля зрушваецца з месца, а будынкі з нізкай сейсмаўстойлівасцю могуць абрынуцца.
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?19
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары