Падчас раскопак у Полацку знайшлі старажытнае графіці і фрагмент галерэі XII стагоддзя
Сумесная экспедыцыя Полацкага дзяржаўнага ўніверсітэта імя Еўфрасінні Полацкай і Дзяржаўнага Эрмітажа ў Санкт-Пецярбургу завяршыла палявыя работы на тэрыторыі былога Барысаглебскага Бельчыцкага манастыра, а таксама каля Сафійскага сабора, паведамляе БелТА.
На тэрыторыі старажытнага манастыра навукоўцы ўдакладнілі месцазнаходжанне Пятніцкай царквы, якая захоўвалася да XX стагоддзя, але была моцна пашкоджаная ў 1920‑я гады і цалкам разабраная ў 1930-я. Ад самога храма цяпер засталіся пераважна сляды падмурка. Археолагі выявілі фрагмент цаглянай сцяны пахавальнай крыпты XVIII стагоддзя — каля 40 сантыметраў у вышыню і прыкладна 4 метры ў даўжыню.
Сярод знаходак таксама аказаліся старажытныя будаўнічыя матэрыялы, у тым ліку плінфы — тонкія цагліны, якія выкарыстоўваліся ў старажытным будаўніцтве.
Асаблівую цікавасць выклікалі кавалкі тынкоўкі з прадрапаным графіці. Паводле папярэдняй ацэнкі, надпіс можа датавацца XVI стагоддзем. На ім, верагодна, пазначана імя «Івашка».
Акрамя таго, археолагі знайшлі манетныя матэрыялы і зафіксавалі пахаванні на гарадскіх могілках XIV—XVI стагоддзяў.
Не менш значныя вынікі атрыманыя падчас раскопак каля Сафійскага сабора. Там даследчыкі выявілі фрагменты дзвюх сцен XII стагоддзя. Яны з'яўляліся часткай галерэй — прыбудоў да старажытнага сабора, якія атачалі яго з розных бакоў. Такія галерэі маглі выкарыстоўвацца, у прыватнасці, для размяшчэння бібліятэкі або для пахаванняў.
Адна са знойдзеных сцен была вядомая даследчыкам і чакалася падчас раскопак, а другую, размешчаную крыху далей на поўнач, археолагі выявілі ўпершыню. Сцены складзеныя ў тэхніцы «ўтопленага шэрагу» і захаваліся прыкладна на паўметра ў вышыню.
Цяпер усе знаходкі і атрыманыя падчас экспедыцыі матэрыялы навукоўцам яшчэ трэба сістэматызаваць і вывучыць. Археалагічныя даследаванні ў Полацку плануюць працягнуць і ў наступным годзе.
У Гродне археолагі знайшлі фрагменты касцёла канца XVI — сярэдзіны XVII стагоддзя
Да юбілею Мінска складуць археалагічную карту горада
Месца, дзе пачынаўся стары Менск, будуць забудоўваць. Ужо ёсць план
Наколькі больш помнікаў архітэктуры ахоўваецца ў Польшчы і Літве ў параўнанні з Беларуссю. Жахлівыя лічбы
На Слонімшчыне школьнікі знайшлі 500 артэфактаў і манету XVII стагоддзя
Цяпер чытаюць
Трагедыя з 30‑гадовай доктаркай са Старобіна — пайшла выдаляць зуб мудрасці і памерла20
Каментары