Свет

Хакеры паведамілі пра ўзлом сайта ФБР і атрыманне звестак пра супрацоўнікаў

Хакерская групоўка ShinyHunters 22 верасня заявіла, што ўзламала сайт Федэральнага бюро расследаванняў ЗША для кандыдатаў на працу і скрала даныя вялікай колькасці дзейных і былых супрацоўнікаў ведамства. У ФБР пацвердзілі, што ведаюць пра несанкцыянаваную актыўнасць, звязаную з сайтам FBIjobs.gov, і расследуюць інцыдэнт, піша Reuters.

Здымак ілюстрацыйны. Фота: magnific.com

Хакеры сцвярджаюць, што атакавалі ФБР у адказ на паведамленне, апублікаванае ведамствам у маі 2026 года. У ім апісваліся метады працы групоўкі і ўтрымліваўся заклік не плаціць вымагальнікам.

Прадстаўнікі ShinyHunters заявілі, што атрымалі даныя «амаль усіх агентаў ФБР і людзей, якія падавалі заявы на працу» ў бюро. У якасці доказу яны апублікавалі скрыншот, нібыта зроблены на змененым хакерамі сайце FBIjobs.gov, а таксама інфармацыю прыкладна пра 5 тысяч агентаў.

Агенцтва Reuters не змагло пацвердзіць сапраўднасць скрыншота, але адзначыла, што сайт для кандыдатаў на працу ў ФБР, верагодна, сапраўды нядаўна працаваў са збоямі. У паведамленні ведамства ад 22 верасня гаварылася, што сайт і партал для кандыдатаў на пасаду спецыяльнага агента часова недаступныя.

У выстаўленым хакерамі фрагменце базы змяшчаліся імёны агентаў, іх хатнія адрасы, нумары сацыяльнага страхавання, службовыя пасады, а ў некаторых выпадках і імёны членаў сем’яў.

Журналістам Reuters удалося часткова пацвердзіць сапраўднасць некаторых звестак. Яны супаставілі інфармацыю, у тым ліку нумары сацыяльнага страхавання, з данымі крэдытных бюро і раней скрадзенымі звесткамі, якія захоўваюцца ў кампаніі District 4 Labs, што аналізуе інфармацыю з даркнэту.

Прынамсі ў дзесяці выпадках, у тым ліку ў дачыненні да дырэктара ФБР Кэша Патэла, журналісты знайшлі звесткі, якія, відавочна, супадалі. Крыніца Reuters, знаёмая з сітуацыяй, таксама паведаміла, што ў некаторых выпадках супадалі апісанні службовых пасад.

Аднак Reuters не змог высветліць, адкуль паходзяць гэтыя даныя і ці былі яны сапраўды скрадзеныя з унутраных сістэм ФБР, як сцвярджаюць хакеры. Звязацца з людзьмі, чые звесткі ўвайшлі ў апублікаваны фрагмент, журналістам не ўдалося.

Былая супрацоўніца ФБР Сінція Кайзер, якая цяпер займае пасаду старшай віцэ-прэзідэнткі ў кампаніі па кібербяспецы Halcyon, заявіла, што падобныя ўцечкі ўяўляюць надзвычайную небяспеку. Паводле яе слоў, злачынцы могуць выкарыстоўваць скрадзеныя даныя для раскрыцця асобаў супрацоўнікаў, якія расследуюць іх дзейнасць, і аказання на іх ціску.

Кайзер нагадала, што інфармацыя, выкрадзеная падчас уцечкі ў 2016 годзе, дагэтуль выкарыстоўваецца для пераследу супрацоўнікаў ФБР. Яна падкрэсліла, што пасля крадзяжу такія звесткі могуць выкарыстоўвацца бясконца.

ShinyHunters лічыцца адной з найбольш вядомых хакерскіх груповак у свеце. Сярод яе нядаўніх атак называюць меркаваны крадзеж мільёнаў бізнэс-запісаў распрацоўшчыка відэагульняў Rockstar Games, стваральніка Grand Theft Auto, а таксама травеньскую атаку на адукацыйны інструмент Canvas, якая выклікала маштабныя збоі ў школах ЗША.

Раней у верасні кампанія Anthropic, якая займаецца штучным інтэлектам, паведаміла пра выяўленне хакераў, звязаных з ShinyHunters, якія спрабавалі выкарыстоўваць яе інструменты.

20 верасня групоўка заявіла Reuters, што пачала супрацьстаянне з іншай вядомай кіберзлачыннай арганізацыяй cl0p. Публічныя канфлікты паміж хакерскімі групоўкамі сустракаюцца рэдка.

Каментары

Цяпер чытаюць

«Гэта такая дробная, агідная помста Рамана». Соф’я Сапега расказала, як яе падманам знялі для перадачы Пратасевіча8

«Гэта такая дробная, агідная помста Рамана». Соф’я Сапега расказала, як яе падманам знялі для перадачы Пратасевіча

Усе навіны →
Усе навіны

Трамп заявіў еўрапейскім лідарам і Зяленскаму, што Пуцін імкнецца да міру6

Самая вядомая бегемоціха свету Фіёна памерла, з'еўшы вязаную шапку1

Расія нанесла новы масіраваны ракетны ўдар, у Кіеве пашкоджаныя тры масты1

Каля Канарскіх астравоў навукоўцы скідаюць у мора будаўнічае смецце. Навошта?

Бульбяная вайна паміж ЗША і Японіяй доўжыцца ўжо 76 гадоў. Чаму японцы не здаюцца?5

Еўропа створыць касмічны апарат для прыбірання смецця на арбіце

«Пуцін і Сі нам не сябры». Як на Захадзе рэагуюць на саміт Трампа ў Шэньджэні1

У Беларусі ўзрасла колькасць забойстваў2

«Святлана не прыйшла на стрым, сапсаваўшы мне дзень нараджэння і настрой і не падарыўшы ніякага падарунка»45

больш чытаных навін
больш лайканых навін

«Гэта такая дробная, агідная помста Рамана». Соф’я Сапега расказала, як яе падманам знялі для перадачы Пратасевіча8

«Гэта такая дробная, агідная помста Рамана». Соф’я Сапега расказала, як яе падманам знялі для перадачы Пратасевіча

Галоўнае
Усе навіны →

Заўвага:

 

 

 

 

Закрыць Паведаміць