У Францыі затрымалі фуру з буйным грузам «вясёлага газу». За рулём быў беларус
У французскім рэгіёне Аксітанія мытнікі канфіскавалі амаль 30 тон закісу азоту, вядомага як «вясёлы газ». Гэта адна з найбуйнейшых канфіскацый такога рэчыва ў Францыі, паведамляе сайт «Беларусь и мир».
14 верасня на пункце збору платы за праезд Мантабан-Нор у дэпартаменце Тарн і Гарона французскія мытнікі спынілі грузавік літоўскай кампаніі, які ехаў з Барселоны ў Парыж. За рулём знаходзіўся 32‑гадовы грамадзянін Беларусі.
Падчас праверкі ў грузавіку знайшлі незвычайны груз — каля 13 тон балонаў з закісам азоту. Яны былі размешчаныя на 14 палетах, абцягнутых тэрмаўсаджвальнай плёнкай.
Працяг расследавання прывёў праваахоўнікаў на склад у Л’Іль-Журдэне ў дэпартаменце Жэр. Там знайшлі яшчэ каля 17 тон закісу азоту, размешчаных на 18 палетах.
У выніку было канфіскавана каля 6000 балонаў агульнай вагой 29 тон. Кошт грузу ацанілі прыкладна ў 665 тысяч еўра.
Беларускага кіроўцу затрымалі, даставілі ў суд у Бардо і ўзялі пад варту. Супраць яго распачалі разбіральніцтва. Следства мяркуе, што мужчына мог быць толькі часткай большай схемы, якой займалася група людзей.
Сярод выстаўленых абвінавачанняў — удзел у злачыннай змове, незаконная перавозка рэчываў, выкананне незадэклараванай працы і адмыванне грошай. Следчыя цяпер спрабуюць высветліць структуру, якая стаяла за маштабным увозам закісу азоту, а таксама вызначыць арганізатараў і іншых удзельнікаў схемы.
Паведамляецца, што ў лютым 2026 года ў Нарбоне ў тым жа рэгіёне французскія праваахоўнікі ўжо затрымлівалі літоўскі грузавік з беларускім кіроўцам. Тады ў ім знайшлі каля 7,2 тоны закісу азоту.
Закіс азоту легальна выкарыстоўваецца ў медыцыне і харчовай прамысловасці, аднак продаж рэчыва прыватным асобам у многіх краінах абмежаваны або забаронены. Некантраляванае ўдыханне можа прывесці да парушэння сардэчнага рытму, абцяжарвання дыхання, парушэння кровазвароту, таксічнага ап’янення, асфіксіі і смерці.
У Францыі ў апошнія гады шырокае нелегальнае ўжыванне «вясёлага газу», асабліва сярод падлеткаў, стала сур’ёзнай праблемай. Продаж закісу азоту фізічным асобам там ужо абмежаваны. З 1 лютага 2027 года яго продаж плануюць цалкам забараніць, а за ўдыханне рэчыва будзе прадугледжвацца пакаранне ў выглядзе пазбаўлення волі на тэрмін да аднаго года.
Малады беларус не хацеў сядзець у Расіі за наркотыкі, таму прыдумаў, як хутка выйсці з калоніі — і выйшаў на ўкраінскія пазіцыі пад Пакроўскам
ЕС разглядае абмежаванні на выкарыстанне сацыяльных сетак дзецьмі
Сляды на старажытных зубах істотна адсунулі пачатак гісторыі ўжывання людзьмі наркатычных рэчываў
Беларуска ездзіла па Чарнагорыі адразу пад пяццю наркотыкамі
Каментары