У Мінску пачалі судзіць трох беларусаў, якім павесілі «тэрарызм» і «здраду дзяржаве». Аднаго з іх затрымалі ў Крыме

Агулам іх судзяць паводле дзевяці цяжкіх артыкулаў Крымінальнага кодэкса, у тым ліку за «ўдзел у тэрарыстычнай арганізацыі», «акт тэрарызму», «здраду дзяржаве», піша «Вясна».

Вядома, што Генрыха затрымалі нібыта па «справе «Байпола» больш за паўтара года таму ў акупаваным Расіяй Крыме, дзе яго збівалі і катавалі. Пазней яго перавезлі ў Беларусь і змясцілі ў СІЗА КДБ. Юрыя затрымалі год таму пры невядомых абставінах. Пра Івана Балашэнку праваабаронцам раней не было вядома. Падрабязнасці гэтай справы невядомыя.

У залежнасці ад ролі кожнага Генрыху, Юрыю і Івану выстаўленыя наступныя артыкулы Крымінальнага кодэкса:

• ч. 4 арт. 309 (наўмыснае прывядзенне ў непрыдатнасць транспартнага сродку або шляхоў спалучэння);
• ч. 3 арт. 289 (акт тэрарызму);
• ч. 2 арт. 290-5 (арганізацыя дзейнасці тэрарыстычнай арганізацыі і ўдзел у ёй);
• ч. 2 арт. 290-4 (стварэнне арганізацыі для ажыццяўлення тэрарыстычнай дзейнасці або ўдзел у ёй);
• ч. 1 і ч. 2 арт. 356 (здрада дзяржаве (у рэд. закона ад 09.01.2019);
• ч. 3 арт. 130 (распальванне варожасці);
• ч. 1 арт. 179 (незаконны збор або распаўсюджванне інфармацыі пра прыватнае жыццё — выключаная 26.05.2021);
• ч. 2 і ч. 4 арт. 295 (незаконныя дзеянні ў адносінах да агнястрэльнай зброі, боепрыпасаў і выбуховых рэчываў);
• ч. 1 арт. 342 (арганізацыя або падрыхтоўка дзеянняў, што груба парушаюць грамадскі парадак або актыўны ўдзел у іх).

Што вядома пра фігурантаў справы?

Генрых Агееў — былы сілавік з Берасцейшчыны. У верасні 2026 года яму споўнілася 32 гады. Палітвязня затрымалі ў лютым 2024 года ў Крыме. Як распавядаў сам Агееў свайму былому сукамерніку, ён з'яўляецца фігурантам «справы «Байпола» — ён нібыта ездзіў па заданні былога супрацоўніка ГУБАЗіК, а цяпер прадстаўніка ініцыятывы «Байпола» Аляксандра Азарава.

Каля сямі месяцаў яго ўтрымлівалі ў СІЗА ФСБ разам з украінскімі ваеннапалоннымі, дзе яго збівалі ды катавалі. Увесь гэты час пра месцазнаходжанне мужчыны было невядома. У верасні 2024 года Агеева экстрадавалі ў Беларусь, пры гэтым не аддалі ніякіх дакументаў, таму час у СІЗА ФСБ не будзе залічаны ў тэрмін прысуду. На радзіму беларуса везлі суткі з мяшком на галаве, распавёў былы сукамернік. 

Юрый Васілеўскі скончыў Беларускі нацыянальны тэхнічны ўніверсітэт. Працаваў у БНТУ спачатку як асістэнт кафедры, а пасля як выкладчык і старшы выкладчык кафедры электразабеспячэння. З 2017 года Васілеўскі ўключаны ў Рэестр судовых экспертаў. Яго профіль — судовая будаўніча-тэхнічная экспертыза. Яго затрымалі ў верасні 2025 года. Спачатку яго ўтрымлівалі ў СІЗА КДБ, а з сакавіка 2026 года перавялі ў СІЗА № 1. 

Пра Івана Балашэнку праваабаронцам нічога невядома.

• 0
• 0
• 1
• 1
• 0
• 4
• 15
• 0