Вясковец з-пад Іўя папрасіў п'янага сябра-бяспраўніка сесці за руль. Той разагнаўся да 202 км/г — і забіў гаспадара аўто аб слуп
20‑гадоваму кіроўцу далі пяць гадоў калоніі.
Суд Іўеўскага раёна вынес прысуд па справе пра смяротную аварыю, паведамляе Гродзенскі абласны суд.
У чэрвені 2026 года 20‑гадовы мясцовы жыхар піў разам з сябрамі. Каля 5‑й раніцы 37‑гадовы гаспадар «Хонды», таксама п'яны, папрасіў яго сесці за стырно. Пасведчання кіроўцы ў маладзёна не было.
Яны ехалі па дарозе ад Іўя ў бок Ліпнішак. Кіроўца разагнаў машыну да 202 км/г, вылецеў з дарогі і на поўнай хуткасці рэзнуўся ў апору лініі электраперадачы.
Гаспадар машыны сядзеў на пярэднім пасажырскім сядзенні і не быў прышпілены рэменем бяспекі. Ён атрымаў цяжкія траўмы і загінуў на месцы.
А кіроўца выжыў, хай і застаўся з паламанай нагой.
Суд прызнаў кіроўцу вінаватым па ч. 4 арт. 317 КК (парушэнне правіл дарожнага руху ў стане алкагольнага ап'янення, якое па неасцярожнасці прывяло да смерці чалавека). Яму прызначылі пяць гадоў пазбаўлення волі ў калоніі агульнага рэжыму і на 8 гадоў забаранілі кіраваць транспартнымі сродкамі.
Акрамя таго, ён павінен выплаціць сястры загінулага 30 000 рублёў кампенсацыі маральнай шкоды.
Цяпер чытаюць
Яму далі 15 гадоў па паказаннях Пратасевіча. Ён пасівеў за адну ноч31
Каментары