Полацкае прадпрыемства выпускае «правераныя ў баявых умовах» бронекамізэлькі ZoV
Полацкае прадпрыемства «ПОЛСПО» вырабляе модульныя бронекамізэлькі пад назвай ZoV, якія прадаюцца і на расійскім рынку. Расійскі сайт, што гандлюе гэтай прадукцыяй, рэкламуе камплект як «правераны ў баявых умовах» і спасылаецца на водгук падраздзялення беспілотнікаў разведвальна-штурмавой брыгады, піша «Белсат».
На бронекамізэлькі звярнулі ўвагу карыстальнікі Threads. Прадукцыя ZoV сапраўды прадстаўленая ў каталогу на афіцыйным сайце «ПОЛСПО». Паводле апісання вытворцы, камізэлька прызначаная для абароны ад агнястрэльнай зброі і аскепкаў, а таксама для змяншэння кантузійных траўмаў, якія могуць узнікаць пры ўдары кулі аб бронепліту.
Керамічныя бранявыя панэлі камізэлькі, як сцвярджаецца, забяспечваюць абарону жыццёва важных органаў паводле класа Бр5. Сам вытворца не тлумачыць паходжанне назвы ZoV, аднак спалучэнне літар Z і V шырока выкарыстоўваецца як сімволіка расійскай вайны супраць Украіны.
У Расіі бронекамізэльку прадаюць праз сайт polspo-russia.ru. На ім пазначаныя кантакты ў Санкт-Пецярбургу і адрас вытворчасці ў Полацку. Пры гэтым сайт юрыдычна аформлены на расійскага індывідуальнага прадпрымальніка.
Камплект ZoV уключае саму бронекамізэльку, браняпліты Бр5 вытворчасці «ПОЛСПО», ахоўны пояс, абарону паху і набор падсумкаў. Прадавец сцвярджае, што выраб прайшоў выпрабаванні ў баявых умовах. У якасці пацвярджэння прыводзіцца водгук падраздзялення беспілотнікаў, байцы якога пасля працяглага выкарыстання ў складаных палявых умовах нібыта назвалі камізэльку адной з найлепшых у сваім класе.
На расійскім сайце таксама пазначана, што камплект сертыфікаваны паводле расійскага стандарту ДАСТ 34286-2017, а вытворчасць адпавядае тэхнічным умовам BY 391615915.016-2022, зарэгістраваным у 2022 годзе. Кошт бронекамізэлькі складае 115 тысяч расійскіх рублёў — каля 1400 даляраў.
Супрацоўніцтва «ПОЛСПО» з расійскім рынкам вядомае ўжо некалькі гадоў. У кастрычніку 2022 года раённая газета «Полацкі веснік» паведамляла, што амаль палова прадукцыі прадпрыемства выкарыстоўваецца ў Беларусі і Расіі, а балістычныя выпрабаванні праводзяцца ў расійскім сертыфікацыйным цэнтры. Паводле інфармацыі выдання, бранявую абарону з Полацка выкарыстоўваюць беларускія ўнутраныя войскі, армія, Следчы камітэт, Служба бяспекі Лукашэнкі і КДБ.
На самім прадпрыемстве бронекамізэльку ZoV называюць адным са сваіх галоўных дасягненняў. У 2024 годзе супрацоўнік «ПОЛСПО» Аляксандр Скарадзёнак расказваў выданню «СБ. Беларусь сегодня», што выраб мае найвышэйшы клас абароны і з'яўляецца навінкай для беларускага рынку.
Сярод пераваг камізэлькі ён адзначаў модульную канструкцыю: камплект можна дапоўніць абаронай паху, каўняром і наплечнікамі. Бранявыя панэлі можна хутка выняць і замяніць непасрэдна ў палявых умовах, а саму камізэльку — скінуць адным рухам рукі.
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары
Напомнило старую рекламу мотошлема фирмы Arai: "Гарантируем похороны в открытом гробу"